अमरावती: फिल्मी थरार! टोलनाका तोडत चालत्या कारमधून उडी मारून पळणाऱ्या सराईत लुटारूला पोलिसांनी घेतले जेरबंद

अमरावतीः अकोल्यात एका नागरिकाला लुटून महागडी कार आणि मोबाईल पळवून नेणाऱ्या सराईत गुन्हेगाराने पोलिसांच्या हातावर तुरी देण्यासाठी थरारक प्रयत्न केला. अमरावती शहर पोलिसांनी नाकाबंदी केली असता आरोपीने चक्क टोलनाका तोडून पळून जाण्याचा प्रयत्न केला, एवढेच नव्हे तर पोलिसांचा ससेमिरा चुकवण्यासाठी त्याने चालत्या वाहनातून उडी मारून पळ काढण्याचाही प्रयत्न केला. मात्र, नांदगाव पेठ पोलीस आणि गुन्हे शाखा युनिट एकच्या या संयुक्त आणि धाडसी कारवाईमुळे हा फिल्मी स्टाइल थरार अखेर आरोपीच्या अटकेने संपुष्टात आला. विकी शांताराम रोकडे (२५ वर्षे, रा. प्रभुत्व नगर, नाशिक) असे अटक आरोपीचे नाव आहे. आरोपीकडून वाहनदेखील जप्त करण्यात आले. रविवारी रात्री १० ते ११ च्या सुमारास हा थरार घडला.

पोलिसांच्या पथकाने तत्परता दाखवत केली नाकाबंदी

अकोलास्थित गोरेगाव-पातूर रोड येथून विकास मोकळे (रा. मोकडेवाडी, अकोला) यांच्यावर चार हल्लेखोरांनी जीवघेणा हल्ला केला. त्यांना गंभीर मारहाण करून जखमी केल्यानंतर आरोपींनी त्यांच्या ताब्यातील एमएच-३०/ बीडब्ल्यू - ६७९१ क्रमांकाची कार आणि दोन मोबाईल जबरदस्तीने हिसकावून अमरावतीच्या दिशेने पोबारा केला. घटनेचे गांभीर्य लक्षात घेत, अकोला स्थानिक गुन्हे शाखेने तातडीने अमरावती शहर पोलिसांना सतर्क केले. या माहितीच्या आधारे नांदगाव पेठ टोलनाक्यावर गुन्हे शाखा युनिट एकचे प्रमुख दिनेश दहातोंडे व नांदगाव पेठचे ठाणेदार सतीश पाटील यांच्या नेतृत्वातील पोलिसांच्या पथकाने तत्परता दाखवत नाकाबंदी केली.

वाळकी डॅम परिसरात आरोपी जेरबंद
क्राईम युनिट एक व नांदगाव पेठ पोलिसांनी रविवारी ११ ऑक्टोबर रोजी रात्री १० च्या सुमारास ती चोरीची कार वेगात येताना दिसताच अडवण्याचा प्रयत्न केला. मात्र, आरोपीने पोलिसांना न जुमानता टोलनाका तोडून पळून जाण्याचा प्रयत्न केला. यावेळी पोलीस पथकाने अत्यंत धाडसाने पाठलाग केला. आरोपीने थेट चालत्या वाहनातूनच खाली उडी मारून पळण्याचा प्रयत्न केला. परंतु, सतर्क पोलिसांनी शिताफीने पाठलाग करत वाळकी डॅम परिसरात त्या आरोपीला जेरबंद केले. पोलिसांनी त्याच्या ताब्यातून जबरी चोरी गेलेली ती महागडी कार आणि तब्बल पाच मोबाईल फोन जप्त केले आहेत. ताब्यात घेतलेला आरोपी आणि जप्त मुद्देमाल अकोला एलसीबी पथकाच्या सुपूर्द करण्यात आला. एपीआय दशरथ आडे व मनीष वाकोडे यांच्या टीमनेही कारवाई यशस्वी केली.