आरटीओची कारवाई कागदावरच! पिंपरी-चिंचवड आणि पुण्यात रॅपिडो बाईक टॅक्सीचे बुकिंग राजरोस सुरूच; पिंपरी चौकातून पुणे स्टेशनचे भाडे १४५ रुपये!

पुणे आणि पिंपरी-चिंचवड (Pimpri-Chinchwad) शहर परिसरात विनापरवाना आणि बेकायदेशीरपणे चालवल्या जाणाऱ्या बाईक टॅक्सीच्या विरोधात प्रादेशिक परिवहन विभाग (RTO) आणि वाहतूक पोलिसांनी कठोर पावले उचलली असतानाही, प्रत्यक्षात मात्र रॅपिडो (Rapidio) कंपनीचे बाईक टॅक्सी बुकिंग ॲपवर राजरोस सुरू असल्याचे समोर आले आहे. प्रशासनाने बंदी घातली असूनही आणि गुन्हे दाखल केले असूनही प्रवाशांना ॲपद्वारे अगदी सहजतेने बाईक टॅक्सी उपलब्ध होत असल्याने आश्चर्य व्यक्त केले जात आहे.

प्रवासाचे भाडे आणि ॲपवरील स्थिती:

सध्या सुरू असलेल्या या अनधिकृत सेवेमुळे प्रवाशांमध्ये संभ्रमाचे वातावरण आहे. उदाहरणार्थ, पिंपरी चौकातून (Pimpri Chowk) पुणे रेल्वे स्टेशनपर्यंत (Pune Station) जाण्यासाठी रॅपिडो ॲपवर बाईक टॅक्सीचे भाडे १४५ रुपये दाखवले जात आहे आणि काही मिनिटांतच चालकाकडून बुकिंग स्वीकारलेही जात आहे. प्रशासनाच्या आदेशांना आणि दंडात्मक कारवाईला कंपनी व चालकांकडून खुलेआम न जुमानता ही सेवा पूर्ववत सुरू असल्यामुळे प्रवासी सुरक्षेचा प्रश्न पुन्हा एकदा ऐरणीवर आला आहे.

प्रशासन आणि परिवहन विभागाची कठोर भूमिका:

यापूर्वी पुणे प्रादेशिक परिवहन प्राधिकरणाच्या बैठकीत कोणत्याही अधिकृत परवान्याशिवाय दुचाकी टॅक्सी चालवणाऱ्या कंपन्यांवर कारवाई करण्याचे स्पष्ट निर्देश देण्यात आले होते. जिल्हाधिकाऱ्यांच्या आदेशानंतरही रॅपिडोने सेवा बंद न केल्यामुळे आरटीओ प्रशासनाने कंपनीविरोधात कायदेशीर फिर्याद देत पोलीस ठाण्यात गुन्हा दाखल केला आहे. तसेच पिंपरी-चिंचवड आरटीओच्या पथकाने विनापरवाना प्रवासी वाहतूक करणाऱ्या काही वाहनांवर दंडात्मक कारवाई देखील केली आहे.

परंतु, इतक्या कठोर कारवाईनंतरही गुगल प्ले स्टोअर आणि ॲपल ॲप स्टोअरवर हे ॲप कार्यरत असून बुकिंग थांबलेले नाही. प्रवाशांची सुरक्षा, चालकांची योग्य पडताळणी, विमा संरक्षण आणि अपघाताच्या प्रसंगी असणारी कायदेशीर जबाबदारी याविषयी कोणतीही स्पष्टता नसताना अशा प्रकारच्या सेवा सुरू राहिल्याने प्रवाशांच्या सुरक्षेचा प्रश्न गंभीर बनला आहे. परिवहन विभागाने नागरिकांना विनापरवाना बाईक टॅक्सी सेवा न वापरण्याचे आवाहन केले असून यावर अधिक कडक प्रशासकीय अंकुश ठेवण्याची मागणी जोर धरत आहे.