सांगली: अपघाती मृत्यू समजल्या जाणाऱ्या दत्तात्रय चाबरे प्रकरणाचा उलगडा; सुपारी देऊन झाला खून!

सांगली: जिल्ह्यातील कवठेमहांकाळ येथील मिरज-पंढरपूर महामार्गावरील 'हॉटेल प्रेम चोरोची' परिसरात काही दिवसांपूर्वी दत्तात्रय चाबरे यांचा मृतदेह आढळला होता. सुरुवातीला हा अपघात किंवा अकस्मात मृत्यू असावा, असा प्राथमिक अंदाज व्यक्त केला जात होता. मात्र, कवठेमहांकाळ पोलिसांनी अत्यंत कल्पकतेने तपास करून या प्रकरणाचा थरारक उलगडा केला असून, हा अपघात नसून सुपारी देऊन केलेली हत्या असल्याचे निष्पन्न झाले आहे.

नेमकं काय घडलं?
दिनांक १९ मे रोजी दत्तात्रय चाबरे यांचा मृतदेह हॉटेल परिसरात संशयास्पद स्थितीत आढळून आला होता. पोलिसांनी या प्रकरणाची तांत्रिक माहिती, सीसीटीव्ही फुटेज आणि गुप्त बातमीदारांकडून मिळालेल्या पुराव्यांच्या आधारे तपास सुरू केला. पोलीस निरीक्षक प्रवीण कांबळे यांनी या गुन्ह्याच्या मुळापर्यंत पोहोचून तपासाची दिशा बदलली.

सुपारीचा कट उघड:
तपासादरम्यान असे समोर आले की, रामचंद्र खिलारे याने दत्तात्रय चाबरे यांचा खून करण्यासाठी तुकाराम सांगोलकर यास एक लाख रुपयांची सुपारी दिली होती. दोघांनी मिळून पूर्वनियोजित कट रचून दत्तात्रय चाबरे यांची निर्घृण हत्या केली. पोलिसांनी या दोघा संशयितांना जेरबंद केले असून, त्यांच्याकडून हत्येचे कारण आणि कट उघड करण्यात आला आहे.

जिल्हा पोलीस अधीक्षक तुषार जोशी, अप्पर पोलीस अधीक्षक कल्पना बारवकर आणि उपविभागीय पोलीस अधिकारी सचिन थोरबोले यांच्या मार्गदर्शनाखाली ही कारवाई करण्यात आली. या घटनेमुळे परिसरात मोठी खळबळ उडाली असून, पोलिसांच्या कामगिरीचे कौतुक होत आहे.