पुण्यात चोरांचा हैदोस! घराचे कडी-कोयंडे तोडून ४ ठिकाणी घरफोड्या; ६ लाखांचा ऐवज लंपास

पुणे: पुणे शहरात घरफोडीच्या घटनांमध्ये मोठी वाढ झाली असून एकाच दिवशी वेगवेगळ्या चार भागांत घरफोड्या झाल्याचे समोर आले आहे. चोरांनी घरांचे कुलूप आणि कडी-कोयंडे तोडून सुमारे ५ लाख ९४ हजार ४७९ रुपयांचे सोन्या-चांदीचे दागिने आणि रोख रक्कम लंपास केली आहे. याप्रकरणी संबंधित पोलीस ठाण्यांमध्ये गुन्हे दाखल करण्यात आले आहेत.

१. नऱ्हे (धायरी) येथील घटना:
शनिवारी (२५ एप्रिल) धायरी परिसरात राहणाऱ्या एका ३८ वर्षीय व्यक्तीच्या घराचा कडी-कोयंडा तोडून चोरांनी आत प्रवेश केला. कपाटातील १ लाख ४९ हजार रुपये किमतीचे सोन्या-चांदीचे दागिने चोरून नेले. नऱ्हे पोलीस या प्रकरणाचा अधिक तपास करत आहेत.

२. फुरसुंगी (उरुळी देवाची) येथील घटना:
फुरसुंगी परिसरात शनिवारी सकाळी १० ते सायंकाळी ५:१५ च्या दरम्यान दुसरी घरफोडी झाली. ५२ वर्षीय घरमालक बाहेर गेल्याची संधी साधून चोरांनी घराच्या मुख्य दरवाजाचे कुलूप तोडले. लोखंडी कपाटातील तिजोरी उचकटून चोरांनी २ लाख ४ हजार रुपयांचे दागिने आणि रोख रक्कम पळवली.

३. लोहगाव येथील घटना:
लोहगाव भागात गुरुवारी रात्री ते शुक्रवारी दुपारी ३ च्या दरम्यान चोरी झाली. चोरांनी ३१ वर्षीय तरुणाच्या घराचे कुलूप तोडून ५४ हजार ४७९ रुपयांचा ऐवज लंपास केला. लोहगाव पोलीस या गुन्ह्याचा तपास करत आहेत.

४. वडगाव शेरी येथील घटना:
चंदननगर पोलीस ठाण्याच्या हद्दीत वडगाव शेरी येथे एका ४० वर्षीय महिलेच्या घरात चोरी झाली. चोरांनी घराचा कडी-कोयंडा तोडून १ लाख ८७ हजार रुपयांचे दागिने आणि रोख रक्कम चोरली. ही घटना शुक्रवार ते शनिवार दरम्यान घडली.

पुणे पोलिसांनी या सर्व प्रकरणांत तपास पथके रवाना केली आहेत. नागरिकांनी घराबाहेर जाताना शेजाऱ्यांना कल्पना द्यावी आणि सुरक्षिततेच्या दृष्टीने सीसीटीव्ही कॅमेरे बसवावेत, असे आवाहन पोलिसांनी केले आहे.