पुण्यात अंमली पदार्थांविरोधात पोलिसांचा मोठा प्रहार! राजस्थान कनेक्शन उघड; ११ जणांना बेड्या, ४८ लाखांचा माल जप्त

पुणे: पुणे शहरात वाढत्या अंमली पदार्थांच्या तस्करीला आळा घालण्यासाठी पोलिसांनी धडक मोहीम हाती घेतली आहे. पोलीस आयुक्तांच्या थेट आदेशानुसार राबवण्यात आलेल्या या विशेष मोहिमेत पोलिसांनी ११ आरोपींना अटक केली असून, त्यांच्याकडून तब्बल ४८ लाख ६६ हजार २५० रुपये किमतीचे अंमली पदार्थ आणि इतर मुद्देमाल जप्त केला आहे.

कुठे झाली कारवाई?
परिमंडळ ७ अंतर्गत येणाऱ्या वाघोली, लोणीकंद, लोहगाव विमानतळ, चंदननगर आणि खराडी या परिसरात ८ एप्रिल ते २३ एप्रिल दरम्यान हे छापे टाकण्यात आले. या मोहिमेत एम.डी. (मेफेड्रॉन) आणि गांजा विक्री करणाऱ्यांविरोधात एनडीपीएस (NDPS) कायद्यांतर्गत एकूण १३ गुन्हे दाखल करण्यात आले आहेत.

राजस्थानपर्यंत धागेदोरे:
अटक केलेल्या आरोपींची सखोल चौकशी केली असता, धक्कादायक माहिती समोर आली आहे. यातील काही आरोपी चक्क राजस्थानमधून 'एम.डी.' हा अमली पदार्थ पुण्यात आणत होते. या माहितीच्या आधारे पुणे पोलिसांनी थेट राजस्थानपर्यंत जाऊन तपास केला आणि या रॅकेटचे धागेदोरे शोधून काढले.

जप्त केलेला मुद्देमाल:
या संपूर्ण कारवाईत पोलिसांनी खालील मुद्देमाल जप्त केला आहे:

२६८.११ ग्रॅम एम.डी. (मेफेड्रॉन)

४८२ ग्रॅम गांजा

२६० ग्रॅम एम.डी. मिश्रित पावडर

एकूण किंमत: ४८,६६,२५० रुपये

शहरात पोलिसांची 'क्लीन सिटी' मोहीम:
पुणे पोलीस दलाने तरुणाईला अंमली पदार्थांच्या विळख्यातून वाचवण्यासाठी ही विशेष मोहीम सुरू केली आहे. वाघोली आणि खराडीसारख्या आयटी हब परिसरात वाढणाऱ्या या गुन्हेगारीला रोखण्यासाठी येणाऱ्या काळातही असेच कडक छापे टाकले जातील, असा इशारा पोलिसांनी दिला आहे. या कारवाईमुळे अंमली पदार्थ माफियांमध्ये मोठी खळबळ उडाली आहे.