छत्रपती संभाजीनगर: समृद्धीवर पुन्हा दगडफेक! सावंगीजवळ वाशिमच्या शासकीय वाहनाची काच फुटली; पाच जण थोडक्यात बचावले

छत्रपती संभाजीनगर: समृद्धी महामार्गावरून प्रवास करणाऱ्या वाहनचालकांच्या सुरक्षेचा प्रश्न पुन्हा ऐरणीवर आला आहे. गुरुवारी सायंकाळी सावंगी परिसरात गुन्हेगारी प्रवृत्तींनी वाशिम जिल्हा सामान्य रुग्णालयाच्या शासकीय वाहनावर दगडफेक केली. धावत्या वाहनाच्या समोरील काचेवर दगड आदळल्याने काच फुटून मोठे नुकसान झाले. वाहनात चालकासह पाच जण होते. अचानक झालेल्या या हल्ल्यामुळे सर्वजण हादरून गेले. मात्र चालकाने प्रसंगावधान राखत कुठेच वाहन न थांबवल्याने मोठा अनर्थ टळून दगडफेक करणाऱ्यांचा हेतू साध्य झाला नाही.


वाशिम जिल्हा सामान्य रुग्णालयाचे कार्यालय अधीक्षक हिंमत राठोड सहकाऱ्यांसह गुरुवारी पुण्याच्या दिशेने निघाले होते. पुण्यात एका महत्त्वाच्या बैठकीला उपस्थित राहण्यासाठी ते निघाले होते. वाहनात चालक रामकिशन घुगे, राठोड यांच्यासह एकूण पाच जण होते. सायंकाळी ६.३० वाजता कार समृद्धी महामार्गावरील चॅनेल क्रमांक ४२६, सावंगी परिसरातून जात असताना अचानक कारवर दगडफेक झाली. दगड समोरील काचेवर आदळल्याने काच फुटली. अचानक घडलेल्या या प्रकाराने राठोड, त्यांचे सहकारी घाबरून गेले. या घटनेनंतरही न डगमगता कार थांबवण्याऐवजी चालकाने कार नियंत्रणात ठेवत घटनास्थळापासून सुमारे तीन किलोमीटर अंतरावर सुरक्षित ठिकाणी नेऊन उभी केली. त्यानंतर ११२ हेल्पलाईनवर संपर्क केला. समृद्धी महामार्ग नियंत्रण कक्षाला माहिती मिळाल्यानंतर सावंगीच्या सुरक्षा पथकाला घटनास्थळी पाठवण्यात आले. महामार्ग पोलिसांचे पथकही दाखल झाले.

तक्रारीविना पुण्याचा प्रवास सुरू
घटनेनंतर पोलिसांनी संबंधितांना जवळच्या हर्सल पोलीस ठाण्यात जाऊन तक्रार दाखल करण्याची सूचना केली. मात्र, पुण्यातील महत्त्वाच्या बैठकीसाठी वेळेत पोहोचणे आवश्यक असल्याने तक्रार नोंदविण्याच्या प्रक्रियेत वेळ जाईल, अशी भूमिका अधिकाऱ्यांनी घेत गुन्हा दाखल न करताच ते पुण्याच्या दिशेने रवाना झाले. परिणामी, रात्री उशिरापर्यंत याप्रकरणी गुन्हा दाखल नव्हता.


दगडफेकीचे सत्र सुरूच
गेल्या सहा महिन्यांमध्ये संपूर्ण समृद्धी महामार्गावर लुटमार, दगडफेकीच्या घटनांमध्ये मोठी वाढ झाली. २०२३ पासूनच वैजापूर तालुक्यातील जांबरगाव आणि सुराळा परिसरात धावत्या वाहनांवर दगडफेक झाल्याच्या घटना घडत आहेत. २०२४ मध्ये बुलढाणा जिल्ह्यात खासगी प्रवासी बसवर दगडफेक होऊन चालक आणि प्रवासी जखमी झाले होते. जून २०२५ मध्येही छत्रपती संभाजीनगर परिसरात अशा घटना घडल्या. नोव्हेंबरच्या पहिल्या आठवड्यात करमाड परिसरातच दोन दगडफेकीच्या घटना घडल्या.



गुन्हा

राजकीय

विडियो गॅलेरी

Leave a Reply

Your email address will not be published. Required fields are marked *