जालना: अभिजीत दीपके घेणार मनोज जरांगे पाटील यांची भेट? मराठा आंदोलनाला मिळणार बळ, नव्या राजकीय समीकरणाची नांदी!

जालना: मराठा आरक्षणाच्या हक्काच्या अंमलबजावणीसाठी अंतरवाली सराटी (Antarwali Sarati) येथे मनोज जरांगे पाटील (Manoj Jarange Patil) यांचे उपोषण सुरू आहे. एकीकडे सरकारने शिष्टमंडळ न पाठवण्याची भूमिका घेतली असून, मनोज जरांगे यांनीही आता आंदोलनाची आरपारची दिशा जाहीर करणार असल्याचे म्हटले आहे. यातच आता कॉक्रोच जनता पार्टीचे (Cockroach Janata Party) संस्थापक अभिजीत दीपके (Abhijeet Dipke) हे आंतरवाली सराटी येथे जाऊन मनोज जरांगे पाटील यांची भेट घेणार असल्याची महत्त्वाची माहिती समोर आली आहे.

मागच्या भेटीची पार्श्वभूमी: नीट (NEET) परीक्षेतील अनियमिततेच्या मुद्द्यावरून अभिजीत दीपके यांनी दिल्लीतील जंतरमंतर येथे तीव्र आंदोलन केले होते. या आंदोलनानंतर देशपातळीवर मोठी चर्चा झाली होती. या आंदोलनादरम्यान मनोज जरांगे पाटील यांनी दिल्लीत जाऊन अभिजीत दीपके यांची भेट घेतली होती आणि त्यांच्या आंदोलनाला जाहीर पाठिंबा दिला होता. आता याच पार्श्वभूमीवर, अभिजीत दीपके अंतरवाली सराटीत जाऊन मनोज जरांगे पाटील यांची प्रत्यक्ष भेट घेणार असल्याचे समजते.

नव्या समीकरणांची नांदी: अभिजीत दीपके आणि मनोज जरांगे पाटील यांच्या या संभाव्य भेटीमुळे राजकीय वर्तुळात जोरदार चर्चा रंगल्या आहेत. शुक्रवारी दुपारी अभिजीत दीपके आंतरवाली सराटी येथे दाखल होणार असल्याचे सूत्रांनी सांगितले. या भेटीमुळे मराठा आरक्षण आंदोलनाला आणखी मोठे बळ मिळण्याची शक्यता वर्तवली जात आहे. तसेच, या भेटीला आगामी राजकारणात एका नव्या समीकरणाची नांदी मानले जात आहे. या भेटीनंतर अभिजीत दीपके माध्यमांसमोर आपली भूमिका स्पष्ट करणार असल्याचे सांगितले जात आहे.

जरांगे पाटील आणि प्रशासनाची भूमिका: दरम्यान, राज्य शासनाकडून शिष्टमंडळ पाठवण्याबाबत कोणतीही हालचाल नसताना, "सरकारला शिष्टमंडळ पाठवायचे असेल तर पाठवावे, मी कोणाचीही वाट पाहत बसलेलो नाही. आम्ही ठरवल्याप्रमाणे मुंबईत जाणारच असून आंदोलनाची पुढील आरपारची दिशा जाहीर करणार," असे मनोज जरांगे पाटील यांनी स्पष्ट शब्दांत सांगितले आहे. तर दुसरीकडे, मराठा समाजाला कुणबी प्रमाणपत्र मिळवण्यासाठी कायदेशीर नियमांचे काटेकोर पालन करणे आणि वंशावळ सिद्ध करणे बंधनकारक आहे, असा कडक पवित्रा प्रशासनाकडून घेण्यात आला आहे.