छत्रपती संभाजीनगर: चुलत भावानेच शेतात नेऊन अल्पवयीन बहिणीवर केला वारंवार अत्याचार; फोटो व्हायरल करण्याची धमकी अन् गरोदर राहिल्यानं काळाबाजार उघड

छत्रपती संभाजीनगर: राज्यात दिवसेंदिवस गुन्हेगारीचं प्रमाण वाढत चाललं असून, छत्रपती संभाजीनगर मधून एक अत्यंत संतापजनक आणि मान खाली घालायला लावणारी घटना उघडकीस आली आहे. सिल्लोड तालुक्यात एका नराधम चुलत भावाने आपल्याच १३ वर्षीय अल्पवयीन बहिणीवर वारंवार लैंगिक अत्याचार केल्याची लाजिरवाणी घटना समोर आली आहे. या घटनेनं संपूर्ण जिल्ह्यात संतापाची लाट उसळली आहे.

नेमकी घटना काय?
मिळालेल्या माहितीनुसार, २५ वर्षीय नराधम आरोपी भावाने १३ वर्षीय चुलत बहिणीला शेतात नेऊन तिच्यावर वारंवार अत्याचार केला. हे लज्जास्पद कृत्य कोणालाही सांगू नये, यासाठी आरोपीने पीडित मुलीचे काही आक्षेपार्ह फोटो काढले होते आणि ते सोशल मीडियावर व्हायरल करण्याची धमकी दिली होती. या सततच्या ब्लॅकमेलिंगमुळे आणि धाकाने अल्पवयीन मुलगी प्रचंड दहशतीखाली होती.

 

गरोदर राहिल्यानं पाप उघड
आरोपीच्या या सततच्या अत्याचारातून ती अल्पवयीन मुलगी गरोदर राहिल्याची धक्कादायक बाब समोर आली. मुलीची प्रकृती बिघडल्यानंतर आणि पोटात दुखू लागल्यानंतर हा सर्व संतापजनक प्रकार उघडकीस आला. या प्रकारानंतर पीडित मुलीच्या कुटुंबीयांच्या पायाखालची जमीनच सरकली. याप्रकरणी सिल्लोड ग्रामीण पोलीस ठाण्यात आरोपी नराधम भावाविरुद्ध पोक्सो (POCSO) कायद्यान्वये आणि विविध गंभीर कलमांखाली गुन्हा दाखल करण्यात आला असून, पोलिसांनी पुढील तपास सुरू केला आहे.