Chiplun Rain : पुराच्या भितीने नागरिकांनी रात्र काढली जागून; अनेकांचे स्थलांतर, शाळांना सुट्टी

कोळकेवाडी धरणातून पाणी सोडल्यामुळे शहरात पाणी भरते, असा नागरिकांचा समज आहे. त्यामुळे जो तो अधिकाऱ्यांना फोन करून कोळकेवाडी धरणातून पाणी सोडणार आहे का, याची विचारणा करत होता. बाहेरगावचे नातेवाईक शहरातील नागरिकांना फोन करून पावसाची माहिती घेत होते. वाशिष्ठी नदीकिनारी राहणाऱ्या भागातील नागरिकांनी पुराच्या भितीने आपले साहित्य सुरक्षित ठिकाणी हलवण्यास सुरवात केली.

महापुराच्या काळात अनेकांच्या वाहनांचे नुकसान झाले होते. त्यामुळे अनेक नागरिकांनी आपली वाहने शहराच्या बाहेर सुरक्षित ठिकाणी ठेवण्यासाठी धडपड करत होते. वाशिष्ठी नदीत ५ मीटरने पाण्याची पातळी वाढली तर नागरिकांना अर्लट राहण्याचा इशारा दिला जातो.

पाण्याची पातळी ७ मीटरने वाढली तर धोक्याचा इशारा दिला जातो. रात्री पाण्याची पातळी ४ ते ५ मीटरच्या मध्येच होती. कधीही पाणी पातळी वाढू शकते, या भितीने सर्व अधिकारी व नागरिक अर्लट होते. वेगवेगळ्या भागातील नागरिकही रात्री रस्त्यापर पाण्याची परिस्थिती बघताना आढळून आले. काही रात्री उशिरा झोपले.

सकाळी ११ वा. वशिष्ठी नदीने इशारा पातळी ओलांडली. नाईक कंपनी, मच्छीमार्केट, वडनाका, मुरादपूर येथील काही ठिकाणी तब्बल १ फूट पाणी भरले होते. ज्या ठिकाणी पाणी भरले होते त्या भागाकडे जाणारी वाहतूक बंद केली होती. त्यानंतर पाणीपातळी कमी होण्यास सुरवात झाली; मात्र पुन्हा १ वा. नदीतील पाण्याने इशारा पातळी ओलांडली.

चिपळूण पालिकेच्या बोटी सांस्कृतिक केंद्र, शंकरवाडी, बाजारपेठ विसर्जन घाट, बसस्थानक, पालिका कार्यालय या ५ ठिकाणी ठेवण्यात आल्या. पालिकेचे बचावपथक ९ ठिकाणी तैनात केले आहे. तलाठी, पोलिस आणि एनडीआरएफची ६ पथके तैनात केलेली आहेत.

एका पथकात ५ तलाठी, ३ पोलिस व ३ जवानांचा समावेश आहे. यातील काही पथकांबरोबर बोटी देण्यात आल्या आहेत. कुंभार्ली घाटात कोसळलेली दरड हटवण्यात आली. त्यामुळे वाहतूक सुरू आहे.