कर्नाटक: आर्थिक विवंचनेतून व्यापाऱ्याने पत्नी आणि दोन मुलींची हत्या करून संपवले स्वतःचे जीवन; सुसाईड नोटमुळे धक्कादायक उलगडा

कर्नाटक: म्हैसूर शहरात मन सुन्न करणारी एक अत्यंत धक्कादायक घटना घडली आहे. कौटुंबिक व आर्थिक ताणतणावातून एका ३९ वर्षीय व्यापाऱ्याने आपल्या ३७ वर्षीय पत्नीसह दोन मुलींची हत्या केली आणि त्यानंतर स्वतःही राहत्या घरी गळफास लावून आत्महत्या केली. या घटनेमुळे संपूर्ण परिसरात मोठी खळबळ उडाली असून सर्वत्र हळहळ व्यक्त केली जात आहे.

पोलिसांनी दिलेल्या माहितीनुसार, म्हैसूरजवळील हुन्सूर येथील हरीशा हा सेकंडहँड गाड्या आणि स्थावर मालमत्तेचा व्यवसाय करत होता. मंगळवारी दुपारी ही घटना उघडकीस आली. हरीशाने त्याची पत्नी निश्चिता आणि १४ वर्षांची निक्षिता व ८ वर्षांची रक्षा या दोन मुलींची झोपेत असताना हत्या केली. पीडितांचे तोंड आणि नाक चिकटपट्टीने बंद करण्यात आले होते, ज्यामुळे त्यांचा गुदमरून मृत्यू झाला. कुटुंबियांना संपवल्यानंतर हरिशानेही आत्महत्या केली.

प्राथमिक तपासात थकीत कर्जाचा डोंगर आणि व्यवसायातील मोठे आर्थिक नुकसान या टोकाच्या पाऊलामागे कारणीभूत असल्याचा संशय व्यक्त केला जात आहे. मागील काही दिवसांपूर्वीच बँकांनी त्याच्या दोन मालमत्ता जप्त केल्या होत्या. आत्महत्या करण्याआधी त्याने एक चिठ्ठी (सुसाईड नोट) लिहून ठेवली होती, ज्यामध्ये मालमत्ता, कर्जे आणि संपत्ती वाटपाविषयी माहिती देण्यात आली आहे. हुन्सूर पोलिसांनी याप्रकरणी गुन्हा दाखल केला असून पोलीस सर्व बाजूंनी या प्रकरणाचा कसून तपास करत आहेत.