बसच चोरीला! तेही थेट बसस्थानकातून.. आरोपीकडून तब्बल २० बसेस चोरल्याची कबुली; पोलीसही चक्रावले!

अमरावती: बसस्थानकातून एखादी दुचाकी किंवा वस्तू चोरीला जाणे ही बाब ऐकली असेल, पण चक्क मोठी इलेक्ट्रिक बसच चोरीला गेल्याची धक्कादायक घटना समोर आली आहे. नागपूरच्या इमामवाडा बस स्थानकावरून थेट 'शिवाई' इलेक्ट्रिक बस चोरून पळवणाऱ्या एका अट्टल चोरट्याला अमरावतीच्या राजापेठ पोलिसांनी शिताफीने अटक केली आहे. या कारवाईत पोलिसांनी १ कोटी ५३ लाख रुपये किमतीची शिवाई बस जप्त केली असून, आरोपीच्या कबुलीनाम्याने पोलीसही हादरले आहेत.

 

नेमके काय घडले? विष्णू गणपती नीलावर (वय २३, रा. हाईत नगर, तेलंगणा) असे अटक करण्यात आलेल्या आरोपीचे नाव आहे. २ जुलै रोजी राजापेठ पोलिसांनी राजापेठ परिसरात गस्त घालत असताना या संशयास्पद हालचाली करणाऱ्या व्यक्तीला ताब्यात घेतले. चौकशीदरम्यान त्याने नागपूरच्या इमामवाडा बस स्थानकावरून १ जुलै रोजी रात्री चार्जिंगला लावलेली शिवाई इलेक्ट्रिक बस चोरल्याची कबुली दिली.

२० बसेस चोरल्याची कबुली: केवळ एक बस नाही, तर या आरोपीने तेलंगणा, हैदराबाद आणि आंध्रप्रदेशातून तब्बल २० बसेस चोरल्याची धक्कादायक माहिती तपासात समोर आली आहे. आरोपीचा गुन्हेगारी पॅटर्न अत्यंत वेगळा होता; तो एकटाच बस चोरून पळून जायचा, त्यानंतर बसमधील महागडे पार्ट जसे की बॅटऱ्या, टायर आणि डिस्क काढून विकायचा आणि उर्वरित बस सोडून द्यायचा. त्याने नांदेड बस डेपोतूनही बस चोरल्याचे मान्य केले असून, त्याच्यावर यापूर्वीच वजिराबाद (नांदेड) आणि तिरुमला (आंध्रप्रदेश) पोलीस ठाण्यात गुन्हे दाखल आहेत.

पोलीस पथकाची कारवाई: राजापेठ पोलीस ठाण्याचे वरिष्ठ पोलीस निरीक्षक संदीप चव्हाण आणि त्यांच्या पथकाने या गुन्ह्याचा छडा लावला. पुढील तपासासाठी आणि कायदेशीर कार्यवाहीसाठी आरोपी आणि जप्त केलेला मुद्देमाल नागपूरच्या गणेशपेठ पोलिसांच्या ताब्यात देण्यात आला आहे. या अट्टल चोरट्याच्या अटकेमुळे बस चोरीच्या अनेक प्रकरणांचा उलगडा होण्याची शक्यता निर्माण झाली आहे.