Thane : मुंबई–नाशिक महामार्गावरील खाडी पूल सज्ज; ठाण्यातील कोंडी फोडण्यासाठी लवकरच 4 नवे उड्डाणपूल, कुठून-कुठे जोडले जाणार?

Thane : ठाण्यातील वाहतूककोंडीवर उतारा म्हणून विविध भागांत रस्त्यांची कामे हाती घेण्यात आली आहेत. त्यातील मुंबई - नाशिक महामार्गावर असलेल्या साकेत खाडी पुलाचे काम पूर्ण झाले आहे. येत्या आठवडाभरात हा पूल सुरू झाल्यानंतर या मार्गावरील कोंडी कमी होण्यास मदत होणार आहे. दुसरीकडे, ठाण्याच्या कोस्टल रोडचे कामगी वेगात सुरू असून उन्नत मार्गाच्या पायाभरणी कामांपैकी ५० टक्क्यांपेक्षा अधिक पूर्ण झाल्याने भविष्यात कोंडीमुक्त प्रवासाचे ठाणेकरांचे स्वप्न प्रत्यक्षात येण्याची शक्यता आहे.

मुंबई-नाशिक महामार्गावर साकेत खाडी पूल अरुंद असल्याने या पट्ट्यात दररोज होणाऱ्या प्रचंड वाहतूककोंडीचा त्रास सर्वसामान्यांना सहन करावा लागत होता. मात्र या मार्गावरील खाडी पुलाचे काम पूर्ण झाले आहे. ठाणे जिल्हा नियोजन समितीच्या बैठकीत भिवंडी ते ठाणे या मार्गावरील वाहतूककोंडीचा विषय अनेक आमदारांनी उपस्थित केला. त्यावर एमएसआरडीसी तसेच वाहतूक विभागाकडून या महामार्गावर असलेले चार पूल लवकरच सेवेत दाखल होणार असल्याचे नमूद केले होते. त्यापैकी साकेत खाडी पुलावर शुक्रवारी भारमान चाचणी घेण्यात आली. हा पूल वाहतुकीसाठी खुला झाल्यानंतर या पट्ट्यातील कोंडी कमी होण्यास मदत होणार आहे.

31 डम्परची चाचणी
साकेत खाडी पुलावर तब्बल 31 डम्पर पूर्ण क्षमतेने भरून उभे करण्यात आले होते. 24 तासांसाठी पुलाच्या विविध भागात डम्पर चालवून आणि उभे करून भारमान चाचणी होणार आहे. यामुळे मुंबई आणि नाशिककडे जाणारी वाहने सुरळीत जाण्यास मदत होणार आहे. तसेच, नव्या पुलावरून मुंबईकडून नाशिकच्या दिशेने व जुन्या पुलावरून नाशिक येथून मुंबईकडे दोन लेनमधून वाहने प्रवास करणार असल्याचे अधिकाऱ्यांनी नमूद केले.

'उन्नत'ची पायाभरणी
बांधकामाला सुरुवात होऊन अवघ्या आठ महिन्यांत ठाणे किनारा मार्ग रस्ता-क्रमांक-1 या प्रकल्पातील उन्नत मार्गाच्या पायाभरणी कामांपैकी 50टक्क्यांपेक्षा अधिक काम पूर्ण झाले आहे. 13.45 किमी लांबीचा, सहा मार्गिकांचा हा ग्रीनफिल्ड मार्ग गायमुख येथे हा मार्ग प्रस्तावित गायमुख फाऊंटन हॉटेल येथील बोगद्याशी थेट जोडला जाईल. या प्रकल्पांमुळे घोडबंदर रोडची वाहतूक कमी होऊन ठाण्यातील अंतर्गत वाहतुकीचा प्रश्न सुटण्याची शक्यता आहे.