वाघोली: सायबर गुन्ह्यांच्या फसवणुकीतील रक्कम फिरविण्यासाठी वापर झालेल्या वाघोली व लोणीकंद येथील बँकेच्या संशयित खातेदारांविरुद्ध गुन्हा दाखल

वाघोली: देशातील वाढत्या सायबर फसवणुकीच्या पार्श्वभूमीवर सायबर गुन्हेगारांना आर्थिक मदत करणाऱ्या 'म्यूल बँक अकाउंट' धारकाविरोधात पुणे शहर पोलिसांनी कारवाईची मोहीम सुरू केली आहे. गेल्या काही दिवसांत पुणे शहरातील विविध पोलीस ठाण्यात अशा संशयित बँक खात्यांचा वापर करून सायबर फसवणुकीची रक्कम फिरविण्याच्या अज्ञात खातेदारांविरुद्ध गुन्हे दाखल करण्यात आले आहेत.

पोलिसांनी नागरिकांना आपल्या नावावर बँक खाते उघडून ते इतरांच्या वापरासाठी देऊ नये, मोबदल्याच्या आमिषाला बळी पडू नये आणि कोणत्याही अनोळखी व्यक्तीस एटीएम कार्ड, चेकबुक, नेट बँकिंग किंवा ओटीपीची माहिती देऊ नये, असे आवाहन केले आहे. अशा प्रकारे खाते वापरू दिल्यास संबंधित खातेदारकालाही सायबर गुन्ह्यात सहआरोपी म्हणून कायदेशीर कारवाईला सामोरे जावे लागू शकते.

 

वाघोली पोलीस ठाण्यात वापरण्यात आलेले 'म्यूल बँक अकाउंट' प्रकरणी वाघोली येथील युको बँकेच्या एका तर लोणीकंद येथील बँक ऑफ महाराष्ट्रच्या दोन संशयित खातेदारांवर वाघोली व लोणीकंद पोलीस ठाण्यात वेगवेगळे तीन गुन्हे दाखल करण्यात आले आहेत. देशातील विविध राज्यांतील सायबर फसवणुकीच्या तпадसादरम्यान संशयास्पद ही खाती समोर आली आहे.

वाघोली पोलीस ठाण्यात पोलीस अंमलदार सतीश बिरादार यांनी दिलेल्या फिर्यादीनुसार, सायबर गुन्ह्यातील मनी ट्रेलचा तपास करताना उत्तर प्रदेश, नवी मुंबई, ठाणे आणि तेलंगणा येथील चार वेगवेगळ्या फसवणूक प्रकरणातील रक्कम या खात्यात जमा झाल्याचे निष्पन्न झाले. संबंधित चार नागरिकांची एकूण २ लाख ६० हजार रुपयांची फसवणूक झाली असून या सर्व प्रकरणातील एकूण फसवणुकीची रक्कम १ कोटी ७६ लाख ७२ हजार ६१६ रुपये असल्याचे तपासात समोर आले आहे. याप्रकरणी अज्ञात खातेदारक व त्याच्या साथीदाराविरुद्ध गुन्हा दाखल करण्यात आला असून पुढील तपास वाघोली पोलीस करीत आहेत.

लोणीकंद पोलीस ठाण्यात महिला पोलीस शिपाई सुवर्णा कहे यांनी दिलेल्या फिर्यादीनुसार, पहिल्या गुन्ह्यात १५ ते २७ सप्टेंबर २०२५ या कालावधीत संबंधित खात्यात सुमारे ४०.०९ लाख रुपयांचे संशयस्पद व्यवहार असल्याचे आढळले. एनसीआरपी आणि समन्वय पोर्टलवरील माहितीनुसार पश्चिम बंगालमधील १४ नागरिकांची फसवणूक करण्यात आली असून त्यातील ६ लाख ३५ हजार रुपये या खात्यात जमा झाल्याचे निष्पन्न झाले आहे.

 

दुसऱ्या गुन्ह्यात २३ जुलै ते १९ ऑगस्ट २०२५ या कालावधीत संबंधित खात्यात २ लाख ५४ हजार ५२६ रुपयांचे संशयस्पद व्यवहार झाले. एनसीआरपी आणि समन्वय पोर्टलवरील माहितीनुसार या खात्याशी संबंधित पश्चिम बंगालमधील या सायबर फसवणुकीच्या तक्रारी आढळून आल्या. या पाच प्रकरणांमध्ये नागरिकांची एकूण ९६ लाख १४ हजार ५०२ रुपयांची फसवणूक झाल्याचे निष्पन्न झाले असून त्यांनी २ लाख ५४ हजार रुपये या बँक खात्यात जमा झाल्याच्या तपासात समोर आले आहे. लोणीकंद पोलीस ठाण्यात दोन गुन्ह्यांमध्ये अज्ञात खातेदारक व त्याच्या साथीदाराविरुद्ध गुन्हा दाखल करण्यात आला असून पुढील तपास पोलीस करीत आहेत.

बँकेच्या कस्टमर केअर मधून बोलत असल्याचे सांगून वाघोलीतील तरुणाची केली एक लाखाची फसवणूक

बँकेच्या कस्टमर केअरमधून बोलत असल्याचे सांगून बोलण्यात गुंतवून वाघोलीतील ३२ वर्षीय तरुणाची अज्ञात सायबर चोरट्यांनी १ लाख ३ हजारांची फसवणूक केल्याचा प्रकार समोर आला आहे. याप्रकरणी वाघोली पोलीस ठाण्यात गुन्हा दाखल करण्यात आला आहे.

याबाबत मिळालेल्या माहितीनुसार, बकोरी रोड परिसरातील तरुणास अज्ञात मोबाईल क्रमांकावरून फोन आला. समोरच्या व्यक्तिने स्वतःला एसबीआय बँकेच्या कस्टमर केअरमधून बोलत असल्याचे सांगितले. फोन चालू असताना तक्रारदाराने कोणताही ओटीपी दिला नाही तरीसुद्धा त्यांच्या क्रेडिट कार्डवरून तीन व्यवहारांद्वारे एकूण १ लाख ३ हजार रुपये वळते करण्यात आले. फसवणुकीची माहिती मिळताच त्यांनी १९३० हेल्पलाइनवर तक्रार नोंदवली. चौकशीत ही रक्कम एसबीआयच्या एका खात्यात जमा झाल्याचे निष्पन्न झाल्यानंतर बँकेकडे पत्रव्यवहार, पाठपुरावा करून संबंधित खातेदाराविरुद्ध गुन्हा दाखल करण्यात आला आहे. पुढील तपास पोलीस करीत आहेत.