नागपूर: दारूच्या नशेत अतिप्रसंगाचा प्रयत्न करणाऱ्या पित्याची अल्पवयीन मुलीनेच केली हत्या; एमआयडीसी परिसरातील घटना

नागपूर: एमआयडीसी पोलीस ठाण्याच्या हद्दीत एका झोपडपट्टीत अत्यंत संतापजनक आणि खळबळजनक घटना घडली आहे. दारूच्या नशेत स्वतःच्याच सतरा वर्षाच्या अल्पवयीन मुलीवर अतिप्रसंग करण्याचा प्रयत्न करणाऱ्या पित्याचा त्याच मुलीने खात्मा केल्याची घटना सोमवारी रात्री उघडकीस आली. या थरारक घटनेमुळे संपूर्ण नागपूर शहरात मोठी खळबळ उडाली आहे.

पोलिसांनी दिलेल्या माहितीनुसार, मृत व्यक्तीचे वय ४५ वर्षे असून तो मोलमजुरीचे काम करायचा. त्याची पत्नी लोकांच्या घरी धुनीभांड्याची कामे करून कुटुंबाचा गाडा हाकते. त्यांना १७ वर्षांची एक मुलगी आणि एक लहान मुलगी आहे. त्यांची मोठी मुलगी ही १२ व्या वर्गात शिक्षण घेत आहे. मृत व्यक्तीला दारूचे तीव्र व्यसन होते आणि तो रोजच दारू पिऊन घरी धिंगाणा घालायचा. नेहमीप्रमाणे तो सोमवारी रात्री उळाशी अत्यधिक दारूच्या नशेत घरी परतला. त्या वेळी घरात केवळ त्यांची १७ वर्षांची मुलगी आणि तिचा लहान भाऊ उपस्थित होते. आई कामावरून अद्याप घरी परहली नव्हती.

दारूच्या नशेत पूर्णपणे तरार असलेल्या त्या नराधम पित्याने घरातील परिस्थितीचा गैरफायदा घेत स्वतःच्याच अल्पवयीन मुलीसोबत अतिप्रसंग करण्याचा व छेडछाड करण्याचा नीच प्रयत्न केला. पित्याच्या या विकृत आणि अमानुष कृत्यामुळे संतप्त झालेल्या अल्पवयीन मुलीने स्वतःचा बचाव करण्यासाठी आणि संतापाच्या भरात जवळच असलेली बॅट उचलून थेट त्याच्या डोक्यात प्रहार केला. या हल्ल्यामुळे तो तोल जाऊन फरशीवर आदळला, आणि फरशीचा एक तुकडा त्याच्या डोक्यात लागल्याने तो गंभीर जखमी होऊन रक्ताच्या थारोळ्यात खाली कोसळला.

काही वेळातच मृतकाची पत्नी (आरोपी मुलीची आई) काम आटोपून घरी परतली. घरी आल्यावर रक्ताच्या थारोळ्यात पडलेला पती आणि घाबरलेली मुलगी पाहून तिला धक्काच बसला. तेव्हा मुलीने घडलेला सर्व प्रकार आपल्या आईला रडत-रडत सांगितला. विशेष म्हणजे, या संपूर्ण प्रकरणाची कोणतीही लपवाछपवी न करता मध्यरात्री स्वतः त्या तरुणीने फोन करून एमआयडीसी पोलिसांना हत्येच्या या घटनेची सविस्तर माहिती दिली.

माहिती मिळताच पोलिसांच्या यंत्रणेत एकच खळबळ उडाली. अतिरिक्त पोलीस आयुक्त वसंत परदेशी, अतिरिक्त पोलीस आयुक्त राजेंद्र दाभाडे, पोलीस उपायुक्त ऋषिकेश सिंगारेड्डी, पोलीस उपायुक्त नित्यानंद झा, सहायक पोलीस आयुक्त वैभव जाधव, सहायक पोलीस आयुक्त यशवंत नलावडे आणि एमआयडीसी पोलीस ठाण्याचे वरिष्ठ पोलीस निरीक्षक बाबुराव राऊत आपल्या फौजफाट्यासह तात्काळ घटनास्थळी दाखल झाले. तोपर्यंत घटनास्थळी परिसरातील नागरिकांची मोठी गर्दी जमली होती. पोलिसांनी तातडीने गंभीर जखमी असलेल्या त्या व्यक्तीला उपचारासाठी नजीकच्या रुग्णालयात हलवले, परंतु डॉक्टरांनी तपासणी केल्यानंतर त्याला मृत घोषित केले.

पोलिसांच्या प्राथमिक चौकशीत धक्कादायक बाब समोर आली आहे. आरोपी तरुणीने पोलिसांना दिलेल्या माहितीनुसार, तिचा पिता गेल्या दोन वर्षांपासून आई घरी नसताना तिला सातत्याने असाच त्रास देत होता. त्याची ही विकृती दिवसेंदिवस वाढत चालली होती आणि नशेत तो सतत छेडछाड करत असे, असा गंभीर आरोप तिने केला. दरम्यान, या प्रकरणी एमआयडीसी पोलिसांनी गुन्हा दाखल केला असून, आरोपी अल्पवयीन मुलीला बाल संरक्षण समितीच्या अधिकाऱ्यांसमोर नियमानुसार हजर करण्यात आले आहे. या प्रकरणाचा पुढील तपास पोलीस करत आहेत.