जळगाव: ४० वर्षीय महिलेवर मित्रासमोरच सामूहिक अत्याचार; नराधमांनी व्हिडीओ बनवून केला व्हायरल, १४ जण अटकेत!

जळगाव: जळगाव जिल्ह्यातील जामनेर तालुक्यातून एक अत्यंत धक्कादायक आणि माणुसकीला काळीमा फासणारी घटना समोर आली आहे. २ जून २०२६ रोजी देऊळगाव-कापूसवाडी परिसरातील एका निर्जन जंगलात ४० वर्षीय महिलेवर
सामूहिक अत्याचार करण्यात आला. या घटनेने संपूर्ण महाराष्ट्र हादरला असून महिलांच्या सुरक्षिततेचा प्रश्न पुन्हा एकदा ऐरणीवर आला आहे.

नेमकं काय घडलं? तक्रारीनुसार, पीडित महिला २ जून रोजी देऊळगाव-कापूसवाडी रस्त्यावरील ठांबरडा नाल्याजवळ असलेल्या जंगलात तिच्या एका मित्रासोबत बसली होती. त्यावेळी तिथे आलेल्या १५ जणांच्या टोळक्याने त्यांना घेरले. टोळक्यातील सदस्यांनी त्यांना धमकावत, मित्राच्या उपस्थितीतच महिलेवर अत्याचार केला.

धक्कादायक बाब म्हणजे, अत्याचार करत असताना नराधमांनी मोबाईलवर त्याचे चित्रीकरण (व्हिडीओ) केले. व्हिडीओ व्हायरल झाल्यावर प्रकरण आले उजेडात. या क्रूर कृत्यानंतर आरोपी तिथून पसार झाले. पीडित महिलेने सुरुवातीला भीतीने ही बाब कोणालाही सांगितली नव्हती. मात्र, काही दिवसांपूर्वी यातील एका आरोपीने तो अश्लील व्हिडीओ सोशल मीडियावर व्हायरल केला. हा व्हिडीओ सर्वत्र पसरल्यानंतर ही संतापजनक घटना उघडकीस आली. त्यानंतर पीडित महिलेने धाडस दाखवत पोलिसांत तक्रार दाखल केली.

 

पोलिसांची धडक कारवाईप्रकरणाचे गांभीर्य लक्षात घेता फत्तेपूर पोलिसांनी तातडीने तपासाला सुरुवात केली. भारतीय न्याय संहिता (BNS) कलम ७०(१), ७७ आणि माहिती तंत्रज्ञान (IT) कायद्याच्या कलम ६६ व ६७ नुसार १५ आरोपींविरुद्ध गुन्हा दाखल करण्यात आला आहे. आतापर्यंत पोलिसांनी १४ आरोपींच्या मुसक्या आवळल्या आहेत, तर एक मुख्य संशयित आरोपी अजूनही फरार आहे. त्याचा शोध घेण्यासाठी पोलिसांची पथके रवाना करण्यात आली आहेत. उपविभागीय पोलीस अधिकारी बापू रोहम यांनी नागरिकांना सतर्क राहण्याचे आवाहन केले असून, अशा स्वरूपाच्या घटनांचा अनुभव असल्यास पुढे येऊन तक्रार करण्याचे आवाहन केले आहे.