Advocate Ashutosh Srivastava Sends Rs10 Crore

पुणे: अत्यंत गाजलेल्या आणि धक्कादायक अशा लोहगड किल्ला हत्याप्रकरणात (Ketan Agrawal Murder Case) आता एक नाट्यमय कायदेशीर वळण आले आहे. या प्रकरणातील मुख्य संशयित आरोपी सिया गोयल हिच्या बाजूने न्यायालयात युक्तिवाद करणाऱ्या अ‍ॅड. आशुतोष श्रीवास्तव यांनी, सियाचा भाऊ साहिल गोयल याच्यावर थेट १० कोटी रुपयांच्या मानहानीची (Defamation) कायदेशीर नोटीस बजावली आहे.

नेमकं प्रकरण काय?
सोमवारी वडगाव मावळ न्यायालयात या प्रकरणाची सुनावणी सुरू असताना एक अनपेक्षित प्रसंग घडला. पोलीस कोठडीची मुदत संपल्याने मुख्य आरोपी सिया गोयल आणि तिचा प्रियकर चेतन चौधरी यांना न्यायालयात हजर करण्यात आले होते. सुनावणी सुरू होताच अ‍ॅड. आशुतोष श्रीवास्तव यांनी न्यायालयात सिया गोयल हिचे वकील म्हणून बाजू मांडण्यास सुरुवात केली. मात्र, याच वेळी न्यायालयात सिया गोयल हिने एक धक्कादायक खुलासा केला. तिने न्यायाधीशांना सांगितले की, "अ‍ॅड. आशुतोष श्रीवास्तव हे माझे अधिकृत वकील नसून, माझे वकील अ‍ॅड. विपुल दुशिंग आहेत."

आपल्याच कथित अशीलने भर न्यायालयात केलेला हा खुलासा ऐकून अ‍ॅड. श्रीवास्तव संतापले आणि त्यांनी तातडीने न्यायालयाबाहेर पडणे पसंत केले. या प्रकरणानंतर साहिल गोयलने अ‍ॅड. श्रीवास्तव यांच्यावर काही गंभीर आणि बिनबुडाचे आरोप केल्याचा दावा श्रीवास्तव यांनी केला आहे.

१० कोटींची कायदेशीर नोटीस:
साहिल गोयलने आपल्यावर केलेले आरोप हे पूर्णपणे खोटे, द्वेषमूलक असून त्यामुळे आपली व्यावसायिक प्रतिष्ठा आणि सामाजिक प्रतिमेला गंभीर धक्का लागला असल्याचे अ‍ॅड. श्रीवास्तव यांनी म्हटले आहे. या मानहानीबद्दल त्यांनी साहिल गोयलकडे १० कोटी रुपयांची नुकसानभरपाई मागितली आहे. तसेच, ४८ तासांच्या आत जाहीर माफी मागावी आणि भविष्यात अशी बदनामीकारक विधाने करणार नाही, असे लेखी आश्वासन द्यावे, अशी कठोर अटही या नोटीसद्वारे घातली आहे.

तपासाची सद्यस्थिती:
दरम्यान, १८ जून रोजी केतन अग्रवालची लोहगड किल्ल्यावरून ढकलून हत्या केल्याप्रकरणी सिया गोयल आणि चेतन चौधरी या दोघांच्या पोलीस कोठडीत न्यायालयाने ३ जुलैपर्यंत वाढ केली आहे. पोलीस या प्रकरणाचा तांत्रिक, डिजिटल आणि परिस्थितीजन्य पुराव्यांच्या आधारे सखोल तपास करत आहेत. या गुन्ह्यात सियाच्या कुटुंबीयांचा काही सहभाग आहे का, याचाही शोध यंत्रणांकडून घेतला जात आहे.