महाराष्ट्र: राज्यात बसले १.१४ कोटी स्मार्ट मीटर; वीज ग्राहकांसाठी आनंदाची बातमी, आता वीज बिलात मिळणार सवलत!

महाराष्ट्र राज्य वीज वितरण कंपनीने (महावितरण) स्मार्ट मीटर बसवण्याच्या मोहिमेत मोठी प्रगती केली असून, आतापर्यंत राज्यात १.१४ कोटी स्मार्ट मीटर बसवण्यात आले आहेत. या नवीन यंत्रणेमुळे ग्राहकांना पारदर्शक बिलिंगसह अनेक तांत्रिक फायदे मिळत आहेत.

अचूक बिलिंग: स्मार्ट मीटरमुळे विजेच्या वापराची शंभर टक्के अचूक नोंद होत आहे. त्यामुळे जुन्या मीटरमधील त्रुटी किंवा रिडींगमधील गोंधळ आता थांबणार आहे.

मोबाईलवरून देखरेख: ग्राहकांना आता त्यांच्या दर तासाचा वीज वापर आपल्या मोबाईलवर पाहणे शक्य झाले आहे. यामुळे वीजवापर नियंत्रणात ठेवण्यास मोठी मदत मिळत आहे.

वीज बिलात सवलत (ToD सुविधा): स्मार्ट मीटरमुळे ग्राहकांना 'टाइम ऑफ डे' (ToD) सुविधेचा लाभ मिळत आहे. वीज दर कमी असलेल्या काळात (उदा. दिवसा सौर ऊर्जेचा वापर उपलब्ध असताना) मोठ्या उपकरणांचा वापर केल्यास ग्राहकांना वीज दरात सवलत मिळते, ज्यामुळे बिलात बचत करणे शक्य झाले आहे.

पारदर्शकता आणि कार्यक्षमता: या मीटरमुळे ग्राहकांचा वीजवापर आणि त्यावरील बिलिंग यामध्ये पूर्ण पारदर्शकता आली आहे. तसेच, ग्राहकांना विजेचा वापर नियोजित पद्धतीने करण्यास प्रोत्साहन मिळत आहे.

कोकण विभाग आघाडीवर: या मोहिमेत कोकण विभागाने मोठी कामगिरी केली असून, सर्वाधिक ४३ लाख ३ हजार ३०३ स्मार्ट मीटर बसवून कोकण विभाग राज्यात अव्वल ठरला आहे.