पुणे: कचऱ्याचा डोंगर कोसळून इमारत जमीनदोस्त,अजून काही जन अडकल्याची भीती ! बचावकार्य युद्धपातळीवर

पुणे: पिंपरी-चिंचवड महापालिकेच्या मोशी येथील कचरा डेपोमध्ये घडलेल्या भीषण दुर्घटनेने संपूर्ण राज्य हादरले आहे. मुसळधार पावसामुळे कचऱ्याचा प्रचंड ढिगारा घसरून 'वेस्ट टू एनर्जी' प्रकल्पाच्या प्रशासकीय इमारतीवर कोसळल्याने इमारत पत्त्याच्या बंगल्याप्रमाणे कोसळली. या दुर्घटनेत अनेक कामगार ढिगाऱ्याखाली अडकले असून त्यांना बाहेर काढण्यासाठी युद्धपातळीवर बचावकार्य सुरू आहे.

घटनास्थळी भेट दिल्यानंतर मंत्री गिरीश महाजन यांनी सांगितले की, इमारतीत सुमारे २२ जण अडकले होते. त्यापैकी काहींना सुरक्षित बाहेर काढण्यात यश आले आहे. मात्र, तीन कामगारांचे पाय काँक्रीटच्या पिलरखाली अडकले असून ते बचाव पथकाला दिसत आहेत. त्यांच्यापर्यंत चहा आणि बिस्किटे पोहोचवण्यात आली असली तरी पिलर हटविल्याशिवाय त्यांना बाहेर काढणे शक्य नसल्याचे त्यांनी सांगितले.

सध्या घटनास्थळी अग्निशमन दल, एनडीआरएफ, पीडीआरएफ, लष्कर, पोलीस आणि महापालिकेची यंत्रणा संयुक्तपणे बचावकार्य करत आहे. पोकलेन आणि इतर यंत्रसामग्रीच्या सहाय्याने ढिगारा हटविण्याचे काम सुरू असून, अडकलेल्या प्रत्येक व्यक्तीला सुरक्षित बाहेर काढण्यासाठी शर्थीचे प्रयत्न सुरू असल्याची माहिती प्रशासनाने दिली आहे.