केरळ: २० वर्षे जुने लाचखोरीचे प्रकरण मुख्य निवडणूक आयुक्त ज्ञानेश कुमार यांच्याविरोधात केरळ सरकारचे नवीन दक्षता चौकशीचे आदेश!

केरळ: मुख्य निवडणूक आयुक्त (CEC) ज्ञानेश कुमार यांच्या अडचणीत वाढ होण्याची शक्यता असून, केरळ सरकारने त्यांच्या विरोधात २० वर्षे जुन्या लाचखोरीच्या प्रकरणात नवीन दक्षता (व्हिजिलन्स) चौकशीचे आदेश दिले आहेत. हे प्रकरण २००६ मधील एका रस्ते प्रकल्पाशी संबंधित असून, त्या काळात ज्ञानेश कुमार केरळमध्ये लोक निर्माण विभाग (PWD) चे सचिव म्हणून कार्यरत होते.

नेमके प्रकरण काय आहे?

केएसटीपी (KSTP) अंतर्गत एमसी रोडच्या (MC Road) उन्नयन आणि आधुनिकीकरणाचे काम 'पॅटिबेल' (Patibel) कंसाोर्टियम या कंपनीला देण्यात आले होते. या प्रकल्पाशी संबंधित १७ कोटी रुपयांची बिले पास करण्यासाठी आणि मंजुरी देण्यासाठी ज्ञानेश कुमार यांनी दोन कोटी रुपयांची लाच मागितल्याचा गंभीर आरोप करण्यात आला आहे. त्या काळात कंपनीचे कंत्राट पूर्ण करणाऱ्या एका उप-ठेकेदाराने हा दावा केला आहे.

त्यावेळच्या या आरोपानंतर कंपनीचे प्रतिनिधी ली सी बीन (Lee See Been) हे तीव्र मानसिक तणावाखाली आले होते आणि त्यानंतर ते त्यांच्या मलेशियातील क्वालालंपूर या मूळ गावी परत गेले. तिथे एका तलावाजवळ त्यांचा मृतदेह आढळून आला होता. त्यांच्या सुसाईड नोटमध्ये केरळमधील अधिकाऱ्यांमधील भ्रष्टाचाराबाबत उल्लेख असल्याचा दावा केला गेला होता. या घटनेनंतर २००६ मध्येही एक प्राथमिक चौकशी सुरू करण्यात आली होती, परंतु त्या वेळी पुरेशा पुराव्यांच्या अभावी आणि आरोपांची पुष्टी न झाल्याने ती चौकशी बंद करण्यात आली होती.

नवीन चौकशी का सुरू करण्यात आली?

आता या जुन्या प्रकरणाबाबत नव्याने तक्रार दाखल झाल्यानंतर आणि कायदेशीर सल्ला घेतल्यावर, केरळ सरकारच्या गृह विभागाने या प्रकरणाची फेरचौकशी करण्याचा निर्णय घेतला आहे. मृताने मृत्यूस कारणीभूत ठरलेल्या परिस्थितीबाबत दिलेल्या विधानांना कायद्यानुसार पुरावा म्हणून ग्राह्य धरले जाऊ शकते, या मुद्द्यावरही कायदेशीर विचारविनिमय करण्यात आला आहे. आता भ्रष्टाचार विरोधी दक्षता व लाचलुचपत प्रतिबंधक ब्युरो (Vigilance Bureau) या जुन्या प्रकरणाची नव्याने सखोल चौकशी करून अहवाल सादर करणार आहे. दरम्यान, या संपूर्ण प्रकरणावर मुख्य निवडणूक आयुक्त ज्ञानेश कुमार यांच्याकडून अद्याप कोणतीही अधिकृत प्रतिक्रिया समोर आलेली नाही.