बुलढाणा: 'क्रांतीज्योती' योजनेचा लाभ मिळवून देण्यासाठी लाच मागणारा अधिकारी एसीबीच्या जाळ्यात!

बुलढाणा: जिल्ह्यातील महिला व बालविकास विभागातील एका संरक्षण अधिकाऱ्याला लाचलुचपत प्रतिबंधक विभागाने (ACB) लाच स्वीकारताना रंगेहाथ पकडल्याने परिसरात खळबळ उडाली आहे. तुषार रमेश राणे असे या लाचखोर अधिकाऱ्याचे नाव आहे.

काय आहे प्रकरण?
तक्रारदाराच्या दिव्यांग मुलीला शासनाच्या 'क्रांतीज्योती बालसंगोपन योजने'अंतर्गत आर्थिक मदत मंजूर करण्यात आली होती. या योजनेचा लाभ मिळवून देण्यासाठी आणि भविष्यातही आर्थिक मदत सुरू ठेवण्यासाठी संरक्षण अधिकारी तुषार राणे यांनी तक्रारदाराकडे चक्क २४ हजार रुपयांच्या लाचेची मागणी केली होती.

 

तक्रारदाराने या प्रकाराची तक्रार लाचलुचपत प्रतिबंधक विभागाकडे (ACB) केली. या तक्रारीची दखल घेत एसीबीने सापळा रचला आणि लाच स्वीकारताना तुषार राणे यांना रंगेहाथ पकडले. या कारवाईनंतर सरकारी योजनेच्या लाभासाठी गरिबांची लूट करणाऱ्या अधिकाऱ्यांविरोधात संताप व्यक्त केला जात आहे. एसीबीकडून या प्रकरणाचा पुढील तपास सुरू असून, गुन्हा दाखल करण्याची कायदेशीर प्रक्रिया पूर्ण केली जात आहे.