हिंगोली: पहिली पत्नी जिवंत असतानाच दुसरं लग्न; मंडपातच पोलिसाने पत्नीला बेदम मारहाण

हिंगोली: कायद्याचे रक्षण करण्याची जबाबदारी असलेल्या एका पोलीस कर्मचाऱ्यावरच कायदा मोडल्याचा गंभीर आरोप झाला आहे. नांदेड पोलीस दलात कार्यरत असलेले प्रशांत गजभारे यांनी पहिली पत्नी जिवंत असताना आणि कायदेशीर घटस्फोट न घेता दुसरा विवाह करण्याचा प्रयत्न केल्याचा आरोप आहे. विशेष म्हणजे, हे लग्न थांबवण्यासाठी मंडपात आलेल्या पहिल्या पत्नीला त्यांनी बेदम मारहाण केल्याची धक्कादायक घटना समोर आली असून, त्याचा व्हिडिओ सोशल मीडियावर मोठ्या प्रमाणात व्हायरल झाला आहे.

माहितीनुसार, प्रशांत गजभारे आणि शारदा गजभारे यांचा २०२२ मध्ये प्रेमविवाह झाला होता. त्यांना दोन वर्षांची मुलगी आहे. कौटुंबिक वाद सुरू असतानाच ५ जुलै रोजी फेसबुकवर पतीच्या दुसऱ्या लग्नाचे फोटो पाहून शारदा गजभारे यांना या विवाहाची माहिती मिळाली. त्यानंतर त्या आपल्या नातेवाईकांसह वसमत येथील कृष्ण मंगल कार्यालयात पोहोचल्या आणि विवाह थांबवण्याचा प्रयत्न केला. यावेळी आरोपीने त्यांच्यावर मारहाण केल्याचा तसेच गळा दाबून जीवे मारण्याचा प्रयत्न केल्याचा आरोप करण्यात आला आहे.

या घटनेत शारदा गजभारे यांच्या हाताला दुखापत झाली असून त्यांनी वसमत शहर पोलीस ठाण्यात तक्रार दाखल केली आहे. त्यांच्या फिर्यादीवरून प्रशांत गजभारे यांच्यासह इतर १२ जणांविरुद्ध विविध कलमांखाली गुन्हा दाखल करण्यात आला आहे. पोलीस या प्रकरणाचा पुढील तपास करत असून संबंधित आरोपींविरुद्ध कायदेशीर कारवाई सुरू आहे.