पुणे: नदीकाठच्या वस्त्यांमध्ये शिरले पाणी, महापालिकेकडून १०० नागरिकांचे तात्काळ स्थलांतर

पुणे: परिसरात मागील काही दिवसांपासून सुरू असलेल्या मुसळधार पावसामुळे शहराला पाणीपुरवठा करणारे खडकवासला धरण भरले आहे. खडकवासला धरण साखळीतील इतर तीनही धरणांतून विसर्ग सुरू असल्याने मुठा नदीमध्ये ४३,५७१ हजार क्युसेकने पाणी सोडण्यात आले. या वाढलेल्या विसर्गामुळे आणि पावसामुळे नदीकाठच्या वस्त्यांमध्ये पाणी शिरण्याच्या घटना घडल्या, ज्यामुळे प्रशासनाची मोठी धावपळ उडाली. पावसामुळे शहरातील अनेक भागांत रस्ते जलमय झाले असून, झाडे कोसळण्याच्या काही तुरळक घटनाही घडल्या आहेत.

सिंहगड रस्ता परिसरातील एकतानगरी परिसरात शुक्रवारी अचानक पाणी शिरल्याने गंभीर परिस्थिती निर्माण झाली. या भागातील जलपूजन अपार्टमेंट, शारदा सोसायटी, द्वारका आणि आनंद पार्क यांसारख्या सोसायट्यांमधील जवळपास शंभर नागरिकांना सुरक्षित ठिकाणी हलवण्यात आले. महापालिकेच्या वतीने तातडीने पावले उचलत या नागरिकांचे सनसिटी परिसरातील बॅडमिंटन हॉल व वांजळे जलतरण तलाव येथील हॉलमध्ये सुरक्षित स्थलांतर करण्यात आले, जेणेकरून कोणतीही जीवितहानी होणार नाही.

सततच्या मुसळधार पावसामुळे उद्भवलेल्या या पार्श्वभूमीवर महापालिकेचा आपत्ती व्यवस्थापन कक्ष २४ तास पूर्णवेळ कार्यान्वित ठेवण्यात आला आहे. तसेच आपत्कालीन परिस्थितीचा सामना करण्यासाठी अग्निशमन विभाग, पथ विभाग आणि मलनिस्सारण विभागातील कर्मचाऱ्यांची विशेष नेमणूक करण्यात आली आहे.

दरम्यान, शहरातील या पूरसदृश परिस्थितीसंदर्भात आढावा घेण्यासाठी महापौर मंजूषा नागपुरे यांच्या उपस्थितीत दुपारी महापौर दालनात विशेष महत्त्वाची अधिकाऱ्यांची बैठक पार पडली. या बैठकीस महापालिका आयुक्त नवल किशोर राम यांच्यासह सर्व वरिष्ठ अधिकारी आणि विविध विभागांचे खातेप्रमुख उपस्थित होते. जलसंपदा विभागाने नदीमध्ये पाण्याचा मोठा विसर्ग सोडण्यात येणार असल्याची घोषणा केल्यानंतर, एकतानगरीसह ज्या-ज्या भागात पाणी शिरण्याची शक्यता वर्तवण्यात आली होती, त्या सर्व भागांमध्ये महापालिकेकडून लाऊड स्पिकरच्या माध्यमातून सतत अनाऊन्समेंट करून नागरिकांना सतर्क राहण्याचे आणि लवकरात लवकर सुरक्षित स्थळी जाण्याचे आवाहन करण्यात आले. याशिवाय महापालिकेच्या विविध विभागाकडील यंत्रणा पूर्णपणे सज्ज ठेवण्यात आली असून आपत्कालीन परिस्थितीवर सतत लक्ष ठेवून असल्याची माहिती महापौर मंजूषा नागपुरे यांनी दिली आहे.