मुंबईकरांनो रविवारचा प्रवास आखण्यापूर्वी 'हे' नक्की वाचा! तिन्ही रेल्वे मार्गांवर उद्या मेगाब्लॉक; सिग्नल यंत्रणेच्या तांत्रिक कामामुळे मध्य, पश्चिम आणि हार्बर लोकलच्या वेळापत्रकात मोठे बदल!

उपनगरी रेल्वे मार्गाच्या रुळांची दुरुस्ती, अभियांत्रिकी कामे, सिग्नल यंत्रणेतील तांत्रिक कामे तसेच ओव्हरहेड उपकरणांच्या देखभालीसाठी रविवारी (ता. २२ नोव्हेंबर २०२६) मध्य, हार्बर आणि पश्चिम रेल्वेवर मेगाब्लॉक घेण्यात येणार आहे. या मेगाब्लॉकमुळे तिन्ही मार्गांवरील लोकलच्या वेळापत्रकात मोठे बदल करण्यात आले असून काही फेऱ्या रद्द तर काही गाड्यांच्या मार्गात बदल केले जाणार आहेत. त्यामुळे रविवारी घराबाहेर पडणाऱ्या प्रवाशांनी वेळापत्रक तपासूनच प्रवासाचे नियोजन करावे, असे आवाहन रेल्वे प्रशासनाकडून करण्यात आले आहे.

१. मध्य रेल्वे (मुख्य मार्ग — ठाणे ते कल्याण):

  • वेळ: सकाळी १०.४० ते दुपारी ३.१० वाजेपर्यंत (अप आणि डाऊन जलद मार्गांवर).

  • परिणाम: सीएसएमटी येथून सकाळी ९.३४ ते दुपारी २.१७ या वेळेत सुटणाऱ्या डाऊन जलद आणि अर्धजलद लोकल गाड्या ठाणे आणि कल्याण स्थानकांदरम्यान डाऊन धीम्या मार्गावर वळवण्यात येतील. या गाड्या त्यांच्या नियोजित थांब्यांव्यतिरिक्त कळवा, मुंब्रा, दिवा, कोपर, डोंबिवली आणि ठाकुर्ली या सर्व स्थानकांवर थांबतील व गंतव्यस्थानी सुमारे १० मिनिटे उशिराने पोहोचतील.

  • तसेच कल्याण येथून सकाळी १०.२८ ते दुपारी २.५८ दरम्यान सुटणाऱ्या अप जलद आणि अर्धजलद लोकल गाड्या कल्याण ते ठाणे स्थानकांदरम्यान अप धीम्या मार्गावर चालवण्यात येतील आणि सर्व स्थानकांवर थांबून मुलुंड स्थानकानंतर पुन्हा अप जलद मार्गावर वळवल्या जातील. मेल आणि एक्स्प्रेस गाड्याही ठाणे-कल्याणदरम्यान पाचव्या व सहाव्या मार्गावरून वळवण्यात येणार आहेत.

२. हार्बर मार्ग (सीएसएमटी ते चुनाभट्टी / वांद्रे):

  • वेळ: डाऊन हार्बर मार्गावर सकाळी १०.४० ते सायंकाळी ४.४० पर्यंत आणि अप हार्बर मार्गावर सकाळी १०.१० ते सायंकाळी ४.१० पर्यंत ब्लॉक असेल.

  • परिणाम: सीएसएमटीवरून सकाळी १०.१० ते सायंकाळी ४.४७ दरम्यान सुटणाऱ्या वाशी/बेलापूर/पनवेलच्या दिशेने जाणाऱ्या डाऊन सेवा तसेच सकाळी १०.०६ ते सायंकाळी ४.४३ दरम्यान वांद्रे/गोरेगावच्या दिशेने जाणाऱ्या डाऊन सेवा रद्द राहतील. त्याचप्रमाणे पनवेल/बेलापूर/वाशी येथून सकाळी ९.१२ ते दुपारी ३.२० दरम्यान आणि गोरेगाव/वांद्रे येथून सकाळी ९.१३ ते सायंकाळी ५.१३ दरम्यान सीएसएमटीकडे येणाऱ्या अप हार्बर सेवा बंद राहतील.

  • पर्यायी व्यवस्था: ब्लॉक कालावधीत प्रवाशांच्या सोयीसाठी पनवेल आणि कुर्ला (फलाट क्रमांक ८) दरम्यान दर २० मिनिटांनी विशेष लोकल चालवल्या जातील. ट्रान्स-हार्बर मार्गावरील ठाणे-वाशी/नेरुळ आणि पोर्ट लाईनवरील नेरुळ/बेलापूर-उरण सेवा नियमित सुरू राहतील. तसेच हार्बर प्रवाशांना सकाळी ९ ते सायंकाळी ६ या वेळेत मुख्य मार्ग आणि पश्चिम रेल्वेवरून प्रवास करण्याची मुभा देण्यात आली आहे.

३. पश्चिम रेल्वे (चर्चगेट ते मुंबई सेंट्रल):

  • वेळ: सकाळी १०.३५ ते दुपारी ३.३५ वाजेपर्यंत (अप आणि डाऊन धीम्या मार्गांवर).

  • परिणाम: ब्लॉक कालावधीत चर्चगेट आणि मुंबई सेंट्रल स्थानकांदरम्यान अप आणि डाऊन धीम्या मार्गावरील सर्व उपनगरीय गाड्या जलद मार्गावरून चालवण्यात येतील. या कामामुळे काही अप आणि डाऊन लोकल फेऱ्या रद्द राहणार असून, चर्चगेटच्या दिशेने जाणाऱ्या काही लोकल गाड्या वांद्रे किंवा दादर स्थानकांपर्यंतच चालवल्या जाणार आहेत.

 



शहर

महाराष्ट्र

गुन्हा

राजकीय

विडियो गॅलेरी

देश विदेश

Leave a Reply

Your email address will not be published. Required fields are marked *