नवी मुंबई: धक्कादायक घटना! उपचारादरम्यान ८ महिन्यांच्या गर्भवतीचा मृत्यू; दुसरीची प्रकृती गंभीर, चौकशी समिती नियुक्त

नवी मुंबई: महापालिकेच्या ऐरोली येथील रुग्णालयात उपचारादरम्यान झालेल्या कथित निष्काळजीपणामुळे आठ महिन्यांच्या गर्भवती महिलेचा मृत्यू झाल्याची धक्कादायक घटना समोर आली आहे. या प्रकरणामुळे आरोग्य यंत्रणेवर गंभीर प्रश्नचिन्ह निर्माण झाले असून दुसरी गर्भवती महिला अद्याप गंभीर अवस्थेत उपचार घेत आहे. या संपूर्ण घटनेची चौकशी करण्यासाठी स्वतंत्र चौकशी समितीचीनियुक्ती करण्यात आली असून १५ दिवसांत अहवाल सादर करण्याचे आदेश देण्यात आले आहेत.

मृत महिलेची ओळख सोनम डोंगरे अशी असून त्या आठ महिन्यांच्या गर्भवती होत्या. त्यांच्यासोबत उपचारासाठी दाखल झालेल्या रिचा मिश्रा यांची प्रकृती गंभीर असून त्यांच्यावर अतिदक्षता विभागात उपचार सुरू आहेत. दोन्ही महिलांना उपचारादरम्यान इंजेक्शन देण्यात आल्यानंतर त्यांची प्रकृती अचानक बिघडल्याचा आरोप नातेवाईकांनी केला आहे.

घटनेनंतर मृत महिलेच्या नातेवाईकांनी रुग्णालय प्रशासनावर निष्काळजीपणाचा आरोप करत तीव्र संताप व्यक्त केला. योग्य उपचार न मिळाल्याने आणि वैद्यकीय हलगर्जीपणामुळे हा मृत्यू झाल्याचा दावा त्यांनी केला असून संबंधित
जबाबदारांवर कठोर कारवाई करण्याची मागणी केली आहे.

या गंभीर घटनेची दखल घेत नवी मुंबई महापालिका प्रशासनाने तातडीने चौकशी समितीची नियुक्ती केली आहे. संबंधित वैद्यकीय अधिकारी, उपचार प्रक्रिया, औषधे व इंजेक्शन देण्याची पद्धत तसेच संपूर्ण उपचार नोंदींची तपासणी केली जाणार आहे.समितीला १५ दिवसांच्या आत सविस्तर अहवाल सादर करण्याचे निर्देश देण्यात आले आहेत.

दरम्यान, रिचा मिश्रा यांची प्रकृती अद्याप चिंताजनक असल्याने त्यांच्यावर डॉक्टरांचे विशेष लक्ष असून आवश्यक ते सर्व उपचार सुरू असल्याची माहिती रुग्णालय प्रशासनाने दिली आहे. चौकशी अहवालानंतर या प्रकरणात पुढील प्रशासकीय आणि कायदेशीर कारवाई होण्याची शक्यता व्यक्त केली जात आहे.