पुणे: 'एनईपी २०२० स्कूल कनेक्ट ३.०' द्वारे सुमारे ४०० विद्यार्थ्यांना उच्च शिक्षण व करिअरच्या नव्या संधींची ओळख

पुणे: भारती विद्यापीठ्स कॉलेज ऑफ इंजिनिअरिंग फॉर विमेन, पुणे यांनी सावित्रीबाई फुले पुणे विद्यापीठाच्या सहकार्याने भारती विद्यापीठ कन्या प्रशाला, पुणे तसेच कर्मवीर भाऊराव पाटील विद्यालय व कनिष्ठ महाविद्यालय, पुणे येथील विद्यार्थ्यांसाठी ‘एनईपी २०२० स्कूल कनेक्ट प्रोग्राम ३.०’ यशस्वीरीत्या आयोजित केला. राष्ट्रीय शैक्षणिक धोरण २०२० (NEP 2020) विषयी व्यापक जागरूकता निर्माण करून विद्यार्थ्यांना उच्च शिक्षणातील विविध संधी, लवचिकता आणि नव्या शैक्षणिक रचनेची माहिती देणे हा या उपक्रमाचा मुख्य उद्देश होता.

कार्यक्रमात प्रसिद्ध शिक्षणतज्ज्ञ, उद्योजिका आणि दूरदृष्टी असलेल्या नेत्या सौ. हर्षदा देशमुख यांनी मुख्य मार्गदर्शक म्हणून विद्यार्थ्यांशी संवाद साधला. त्यांनी उच्च शिक्षणाचे बदलते महत्त्व, भविष्यातील करिअरच्या विविध संधी, उद्योग जगतातील आव्हाने आणि ध्येयपूर्तीसाठी आवश्यक असलेल्या आत्मविश्वासाविषयी सखोल मार्गदर्शन केले. त्यांच्या प्रेरणादायी विचारांमुळे विद्यार्थ्यांना भविष्यातील शैक्षणिक वाटचालीसाठी एक नवी आणि स्पष्ट दिशा मिळाली.

या प्रसंगी महाविद्यालयाचे प्राचार्य प्रा. डॉ. प्रदीप जाधव यांनी विद्यार्थ्यांना संबोधित करताना सांगितले की, एनईपी २०२० अंतर्गत विद्यार्थ्यांना शिक्षणात मोठी लवचिकता आणि बहुविषयक पर्याय उपलब्ध झाले आहेत. विद्यार्थ्यांनी स्वतःची आवड, व्यावहारिक कौशल्ये आणि भविष्यातील करिअरची उद्दिष्टे योग्य प्रकारे ओळखून योग्य शैक्षणिक मार्गाची निवड करावी आणि या धोरणाचा पूर्ण लाभ घ्यावा, असे आवाहन त्यांनी केले.

कार्यक्रमाचे नियोजन आणि समन्वयन डॉ. शितल पवार (एनईपी समन्वयक) आणि डॉ. मिलिंद पटवर्धन (सहसमन्वयक) यांनी केले. मार्गदर्शन करताना डॉ. शितल पवार यांनी एनईपी २०२० ची मुख्य उद्दिष्टे, बहुविषयक शिक्षण पद्धती (Multidisciplinary Education), लवचिक अभ्यासक्रम, कौशल्याधारित शिक्षण (Skill-based Learning), इंटर्नशिपच्या संधी, विविध शैक्षणिक शिष्यवृत्ती आणि 'स्वयं' (SWAYAM) व 'साथी' (SATHEE) यांसारख्या डिजिटल शैक्षणिक व्यासपीठांची सविस्तर माहिती दिली.

या विशेष उपक्रमाचा लाभ दोन्ही शाळांमधील सुमारे ४०० विद्यार्थ्यांनी घेतला. या कार्यक्रमामुळे विद्यार्थ्यांमध्ये राष्ट्रीय शैक्षणिक धोरण, उच्च शिक्षणातील आधुनिक संधी, व्यावहारिक कौशल्यांची गरज आणि उच्च शिक्षणासाठी उपलब्ध असलेल्या विविध संसाधनांविषयी मोठी जागरूकता निर्माण झाली.

हा उपक्रम यशस्वी करण्यासाठी उपप्राचार्य डॉ. अविनाश पवार आणि डॉ. एस. एस. चोरगे यांचे मोलाचे सहकार्य लाभले. तसेच प्रा. सीमा हडके, प्रा. किरण येसुगडे, प्रा. संपदा कदम, प्रा. यशोमती धुमाळ आणि प्रा. रोशना सपकाळ यांनी कार्यक्रमाच्या यशस्वी नियोजन व अंमलबजावणीत महत्त्वपूर्ण योगदान दिले.

विद्यार्थ्यांना शाळा स्तरावरच उच्च शिक्षणाच्या विश्वाची प्रत्यक्ष ओळख करून देत करिअरविषयी जागरूकता, कौशल्य विकास आणि शाळा व उच्च शिक्षण संस्थांमधील परस्पर संवाद मजबूत करण्याच्या भारती विद्यापीठ्स कॉलेज ऑफ इंजिनिअरिंग फॉर विमेनच्या वचनबद्धतेचे हा उपक्रम एक उत्तम उदाहरण ठरला.