शेअर बाजारात सोमवार ठरला 'ब्लॅक मंडे'; सेन्सेक्स १००० हून अधिक अंकांनी घसरला, कच्च्या तेलाच्या किमती भडकल्या

मुंबई: पश्चिम आशियातील वाढता भू-राजकीय तणाव आणि कच्च्या तेलाच्या वाढत्या किमतींमुळे आठवड्याच्या पहिल्याच दिवशी देशांतर्गत शेअर बाजारात जोरदार घसरण पाहायला मिळाली. १८ मे रोजी बाजारातील सुरुवातीच्या व्यवहारात मुंबई शेअर बाजाराचा निर्देशांक 'बीएसई सेन्सेक्स' (BSE Sensex) १००० हून अधिक अंकांनी कोसळला, तर नॅशनल स्टॉक एक्सचेंजचा 'निफ्टी५०' (Nifty 50) ३०० हून अधिक अंकांनी खाली आला. या मोठ्या पडझडीमुळे गुंतवणूकदारांचे प्रचंड नुकसान झाले असून रुपयानेही डॉलरच्या तुलनेत आतापर्यंतचा ऐतिहासिक नीचांक गाठला आहे.

गुंतवणूकदारांचे ७ लाख कोटी रुपये स्वाहा
सोमवारी सकाळी ९.५० वाजता मुंबई शेअर बाजार १,०१०.६४ अंक म्हणजेच १.३४ टक्क्यांच्या घसरणीसह ७४,२२७.३५ अंकांवर ट्रेड करत होता. त्याच वेळी, निफ्टी निर्देशांक ३०३.२५ अंकांनी घसरून २३,३४०.२५ अंकांवर खाली आला. या चौफेर विक्रीमुळे बीएसईवर (BSE) सूचीबद्ध असलेल्या कंपन्यांचे मार्केट कॅप (बाजार भांडवल) थेट ७ लाख कोटी रुपयांनी कमी होऊन ४५४ लाख कोटी रुपयांवर आले.

डोनाल्ड ट्रम्प यांच्या धमकीमुळे बाजारात भूकंप
अमेरिकेचे राष्ट्राध्यक्ष डोनाल्ड ट्रम्प यांनी सोशल मीडियावर इराण संदर्भात एक मोठी चेतावणी दिली आहे. "इराणसाठी वेळ संपत चालली आहे आणि त्यांनी लवकरच निर्णय घेतला नाही, तर त्यांच्याकडे काहीही उरणार नाही," असे ट्रम्प यांनी आपल्या पोस्टमध्ये म्हटले आहे. या धमकीमुळे जागतिक बाजारात भीतीचे वातावरण निर्माण झाले आणि कच्च्या तेलाच्या किमतीत अचानक मोठी वाढ झाली. ब्रेंट क्रूड (Brent Crude) १.८४ टक्क्यांनी वाढून १०७.३ डॉलर प्रति बॅरलवर पोहोचले, तर इंडियन बास्केट देखील ०.२४ टक्क्यांनी वाढून प्रति बॅरल १०९.३ डॉलरवर गेले.

'या' शेअर्समध्ये झाली मोठी घसरण
सुरुवातीच्या सत्रात सेन्सेक्समधील पॉवर ग्रिडच्या शेअरमध्ये सर्वाधिक ३.८१ टक्क्यांची घसरण झाली. याशिवाय टाटा स्टील, मारुती सुझुकी, टायटन, बजाज फायनान्स, एचडीएफसी बँक, बजाज फिनसर्व्ह आणि महिंद्रा अँड महिंद्रा या आघाडीच्या कंपन्यांच्या शेअर्समध्येही लक्षणीय पडझड झाली. दुसरीकडे, जागतिक पडझडीच्या काळातही इन्फोसिस, टेक महिंद्रा आणि टीसीएस या आयटी क्षेत्रातील शेअर्समध्ये वाढ नोंदवली गेली. क्षेत्रीय आघाडीवर निफ्टी रियल्टी, निफ्टी ऑटो आणि निफ्टी मीडिया यांची कामगिरी अत्यंत निराशाजनक राहिली.

डॉलरसमोर रुपयाची नांगी; ऐतिहासिक नीचांकावर
अमेरिकी डॉलरच्या तुलनेत भारतीय रुपयाची घसरण थांबण्याची चिन्हे दिसत नाहीत. इराण युद्धाचा भडका आणि कच्च्या तेलाच्या किमती वाढल्यामुळे रुपयाची शंभरीच्या दिशेने वेगाने वाटचाल सुरू आहे. सकाळच्या सत्रात रुपया ०.२ टक्क्यांनी घसरून ९६.१८ प्रति डॉलर या आतापर्यंतच्या सर्वात नीचांकी पातळीवर आला. २८ फेब्रुवारी रोजी इराणमध्ये तणाव वाढल्यापासून रुपया डॉलरच्या तुलनेत ५.५ टक्क्यांनी घसरला असून चालू वर्षात आशियाई चलनांमध्ये रुपयाची कामगिरी सर्वात खराब राहिली आहे.