मुंबई: ठाण्यात सायबरलूट फोफावली! ३५१ गुन्ह्यांत तब्बल ८४ कोटींची ऑनलाइन फसवणूक; गुन्हे उघडकीस आणण्याचे प्रमाण अवघे ८ टक्के

मुंबई: ठाणे पोलीस आयुक्तालय क्षेत्रामध्ये गेल्या काही काळात सायबर गुन्हेगारीच्या घटनांमध्ये प्रचंड वाढ झाली असून, ऑनलाइन आर्थिक फसवणुकीने उच्चांक गाठला आहे. पोलिसांकडे नोंद झालेल्या एकूण ३५१ सायबर गुन्ह्यांमध्ये भामट्यांनी नागरिकांची तब्बल ८४ कोटी १३ लाख ४५ हजार रुपयांची छुप्या पद्धतीने लुबाडणूक केली आहे. विशेष म्हणजे, या गंभीर गुन्ह्यांपैकी पोलीस प्रशासनाला अवघे ८ टक्केच गुन्हे उघडकीस आणण्यात यश आले असून, यामुळे सामान्य नागरिकांमध्ये चिंतेचे वातावरण निर्माण झाले आहे.

शेअर मार्केट आणि गुंतवणुकीच्या नावाखाली सर्वाधिक गंडा: सायबर गुन्हेगारांनी नागरिकांना फसवण्यासाठी विविध क्लृप्त्या शोधल्या आहेत. एकूण ३५१ गुन्ह्यांमध्ये सर्वाधिक ९५ गुन्हे हे शेअर मार्केट, बनावट गुंतवणूक योजना, बचत आणि पॉलिसीशी संबंधित आहेत. या एकाच श्रेणीतील गुन्ह्यांमध्ये नागरिकांची सर्वाधिक, म्हणजेच तब्बल ३३ कोटी १० लाखांची लूट झाली आहे. याशिवाय, फसवणूक करणारे फिशिंग कॉल्स, एसएमएस, बनावट लिंक्स आणि एपीके (APK) फाइल्स पाठवून लोकांच्या बँक खात्यावर डल्ला मारत आहेत. अशा लिंक व एसएमएसशी संबंधित ७२ गुन्ह्यांची नोंद झाली असून, याद्वारे ३० कोटी ५३ लाखांची फसवणूक झाली आहे.

'डिजिटल अरेस्ट' आणि पार्सलच्या नावाखाली भीती: तरुण, महिला आणि ज्येष्ठ नागरिकांना विविध क्लृप्त्या वापरून लक्ष्य केले जात आहे. काही प्रकरणांमध्ये नागरिकांना 'डिजिटल अरेस्ट' (Digital Arrest) केल्याची भीती दाखवली जाते, तर काही जणांना "तुमच्या नावाच्या पार्सलमध्ये अमली पदार्थ (ड्रग्ज) सापडले आहेत," अशा प्रकारच्या धाकधपटशा दाखवून ऑनलाइन माध्यमातून मोठी रक्कम उकळली जात आहे. गुन्हेगार पोलिसांच्या सहजासहजी हाती लागत नसल्यामुळे सायबर गुन्हेगारीचे जाδ दिवसेंदिवस अधिकच विस्तारत चालले आहे.

तपास आणि पोलिसांसमोरील आव्हाने: समोर आलेल्या ३५१ गुन्ह्यांपैकी पोलिसांनी आतापर्यंत केवळ २८ गुन्ह्यांची उकल करत २५ आरोपींना अटक केली आहे. गुन्हे उघडकीस येण्याचे प्रमाण अवघे ८.४२ टक्के इतकेच आहे, तर काही विशिष्ट प्रकारच्या सायबर गुन्ह्यांमध्ये एकाही गुन्ह्याची उकल झालेली नाही. त्यामुळे सायबर चोरट्यांना जेरबंद करण्यासाठी आणि नागरिकांची ही होणारी आर्थिक लूट रोखण्यासाठी पोलीस यंत्रणेला अधिक कठोर पावले उचलण्याची गरज असल्याचे मत तज्ज्ञांकडून व्यक्त केले जात आहे.