थरारक आणि विचित्र अपघात! वसईत भरधाव डम्पर थेट लोखंडी पुलाला धडकला; हायड्रोलिक बटण दाबल्याने डम्पर हवेत अधांतरी लटकला

वसई / पालघर: मुंबई-अहमदाबाद राष्ट्रीय महामार्गावर रविवारी पहाटेच्या सुमारास एक अत्यंत थरारक आणि आजवरचा सर्वात विचित्र अपघात घडल्याचे समोर आले आहे. वसई तालुक्यातील कोपर फाटा येथे मुंबई-बडोदा द्रुतगती महामार्गाच्या (Mumbai-Vadodara Expressway) उभारणीसाठी तयार करण्यात आलेल्या अजस्र लोखंडी पुलाच्या (Iron Bridge) रचनेत एक भरधाव डम्पर थेट हवेत अधांतरी अडकला. हा अपघात इतका अद्भूत आणि भीषण होता की डम्परची केबिन रस्त्यावर आणि मागचा मोठा सांगाडा थेट पुलाच्या लोखंडी स्ट्रक्चरमध्ये अडकून संपूर्ण डम्पर उभा झाला होता.

चुकून दाबले गेले हायड्रोलिक सिस्टिमचे बटण
प्राथमिक माहितीनुसार, हा डम्पर महामार्गावरून अत्यंत भरधाव वेगाने चालला होता. प्रवासादरम्यान चालकाकडून नकळत किंवा तांत्रिक बिघाडामुळे डम्परच्या हायड्रोलिक सिस्टिमचे (Hydraulic System) बटण दाबले गेले. यामुळे डम्पर वेगात असतानाच त्याचा मागचा डम्परचा भाग (हौदा) हळूहळू वर उचलला गेला. डम्परचालकाच्या ही गोष्ट लक्षात येण्यापूर्वीच, वर उचलला गेलेला हा अवजड भाग कोपर फाटा येथील निर्माणाधीन लोखंडी ब्रिजला जाऊन प्रचंड वेगाने धडकला.

डम्पर हवेत लटकला; महामार्गावरील वाहतूक विस्कळीत
धडक इतकी भीषण होती की, डम्परचा मागचा भाग लोखंडी पुलाच्या खांबांमध्ये आणि गर्डरमध्ये घट्ट अडकला. वेग जास्त असल्याने डम्परचे पुढचे चाक आणि संपूर्ण इंजिनचा भाग रस्त्यापासून वर उचलला गेला आणि डम्पर थेट हवेत उभा लटकला. या विचित्र अपघाताची माहिती मिळताच महामार्ग पोलीस आणि स्थानिक प्रशासनाने घटनास्थळी धाव घेतली. डम्पर अशा पद्धतीने मध्योमध अडकल्यामुळे मुंबई-अहमदाबाद महामार्गावरील गुजरातकडे जाणाऱ्या मार्गिकेची एक लेन वाहतुकीसाठी पूर्णपणे बंद करावी लागली.

युद्धपातळीवर बचावकार्य सुरू
सुदैवाने या अपघातात कोणतीही जीवितहानी झाल्याचे वृत्त नाही, मात्र हायवेच्या मधोमध उभ्या लटकलेल्या डम्परमुळे वाहनांच्या वेगाला ब्रेक लागला असून वाहतूक संथ गतीने सुरू आहे. डम्परला पुलाच्या लोखंडी विळख्यातून बाहेर काढण्यासाठी प्रशासकीय यंत्रणा आणि मोठ्या हायड्रोजन क्रेन पाचारण करण्यात आल्या आहेत. क्रेनच्या साहाय्याने डम्पर सुरक्षित खाली उतरवण्याचे आणि महामार्गावरील वाहतूक पूर्ववत करण्याचे प्रयत्न युद्धपातळीवर सुरू आहेत.