सिंधुदुर्ग: "पर्यटकांचा धिंगाणा अन् ग्रामस्थ आक्रमक; कुंभवडे धबधब्यावर ३० ऑगस्टपर्यंत प्रवेशबंदी."

सिंधुदुर्ग: सावंतवाडी तालुक्यातील कुंभवडे धबधब्याचे पर्यटन थांबवण्याचा निर्णय ग्रामपंचायतीच्या मंगळवारी (दि. ११ ऑगस्ट) बैठकीत घेण्यात आला. पर्यटकांच्या गैरवर्तनामुळे गावातील शांतता आणि सुरक्षा धोक्यात आल्याने हा निर्णय झाला आहे. सावंतवाडी तालुक्यातील कुंभवडे (बाबा) धबधब्याकडे जाणाऱ्या पर्यटकांचा हुल्लडबाजी, वाहतूक कोंडी आणि दारूचा धिंगाणा वाढल्याने चौकुळ ग्रामस्थ अत्यंत आक्रमक झाले आहेत. गेल्या रविवारी वाहतूक कोंडी सोडवणाऱ्या ग्रामस्थांना पर्यटकांनी चक्क दंडुके आणि छोट्या कुऱ्हाडी दाखवून घाबरविण्याचा प्रयत्न केल्याचा धक्कादायक प्रकार समोर आला आहे.

या गंभीर घटनेनंतर ग्रामस्थ व ग्रामपंचायतीने संयुक्त बैठक घेऊन चौकुळ गावातून कुंभवडे धबधब्याकडे जाणाऱ्या पर्यटकांना ३० ऑगस्टपर्यंत पूर्णपणे प्रवेशबंदी करण्याचा धडक निर्णय घेतला आहे.सरपंच गुलाबराव गावडे यांच्या उपस्थितीत ग्रामपंचायत कार्यालयात पार पडलेल्या बैठकीत पर्यटकांच्या त्रासावर कायमस्वरूपी तोडगा काढण्याबाबत चर्चा झाली. "शांतता, सुरक्षितता आणि ग्रामस्थांचा सन्मान धोक्यात आणणारे पर्यटन आम्हाला नकोच," अशी ठाम भूमिका घेत ग्रामस्थांनी ३० ऑगस्टपर्यंत या मार्गाने न येण्याचे आवाहन पर्यटकांना केले आहे. ३० ऑगस्टनंतर पर्यटनाबाबत अधिक कडक नियमावली निश्चित केली जाणार आहे.

हत्यारे दाखवून घाबरवण्याचा प्रयत्न
वाहतूक कोंडी सोडवण्यासाठी गेलेल्या ग्रामस्थांना पर्यटकांनी हातात दंडुके व छोट्या कुऱ्हाडीसदृश हत्यारे दाखवून घाबरवण्याचा प्रयत्न केला. याप्रकरणी पोलिसांना निवेदन देऊन दोषींवर कठोर कायदेशीर कारवाई करण्याची मागणी केली जाणार आहे.

कचरा, दारूच्या बाटल्या अन् महिलांना त्रास
रस्त्यांच्या कडेला वाहने उभी करणे, दारू पिऊन बाटल्या फोडणे आणि ये-जा करणाऱ्या महिलांना त्रास देण्याच्या प्रकारांमुळे ग्रामस्थांमध्ये तीव्र संताप आहे. त्यामुळे गावाची शांतता भंग करणाऱ्या पर्यटनाला आळा घालण्यासाठी हे पाऊल उचलले गेले.

३० ऑगस्टनंतर कडक नियमावली लागू होणार
ग्रामस्थांनी घेतलेल्या या भूमिकेमुळे कुंभवडे धबधब्याच्या पर्यटन व्यवस्थेचा प्रश्न ऐरणीवर आला आहे. ३० ऑगस्टनंतर चौकुळमार्गे पर्यटन सुरू ठेवायचे की नाही आणि ठेवायचे असल्यास कोणते कडक निर्बंध लादायचे, याचा अंतिम निर्णय घेतला जाईल.