रणवीर सिंग धमकी प्रकरणात मोठा ट्विस्ट… कनेक्शन थेट पंजाब आणि हरियाणा पर्यंत

बॉलिवूड अभिनेता रणवीर सिंगला धमकी दिल्याबद्दल मुंबई गुन्हे शाखेने लॉरेन्स बिश्नोई टोळीचा सदस्य हरिचंद्र उर्फ ​​हॅरी बॉक्सर याच्याविरुद्ध लूक आउट सर्क्युलर (LOC) जारी केल्याची माहिती समोर येत आहे. मिळालेल्या माहितीनुसार, रणवीर सिंगच्या मॅनेजरला मिळालेल्या धमकीच्या व्हॉइस नोटची पडताळणी करण्यासाठी पोलिसांनी पंजाब आणि हरियाणा येथे एक पथक पाठवलं होतं. व्हॉइस नोट पाठवणाऱ्याने स्वतःची ओळख हॅरी बॉक्सर म्हणून करून 20 कोटी रुपयांच्या खंडणीची मागणी केली होती. मुंबई पोलिसांना या धमकीच्या व्हॉइस नोटची माहिती मिळाल्यावर, पोलिसांनी एक पथक पंजाब आणि हरियाणा पाठवलं… तेथून व्हॉइस नोटमधील आवाज हॅरी बॉक्सरचा असल्याची पुष्टी केल्यानंतर, एफआयआर दाखल करण्यात आला आहे.

रणवीर सिंगचे मॅनेजर विजय सुब्रमण्यम यांच्या तक्रारीवरून मुंबई सायबर पोलिसांनी हॅरी बॉक्सरविरुद्ध एफआयआर दाखल केला आहे. मुंबई पोलीस क्राईम ब्रांचच्या खंडणीविरोधी सेलसोबत मिळून या प्रकरणाचा तपास करत असल्याची माहिती देखील समोर येत आहे.  रणवीरच्या मॅनेजरच्या व्हॉट्सअ‍ॅपवर आलेल्या व्हॉइस नोटमधील आवाज हॅरी बॉक्सरचाच असल्याची पुष्टी झाल्याचं सूत्रांनी सांगितलं आहे. मात्र, यासंदर्भातील इतर ठोस पुरावे गोळा करण्याचं काम क्राइम ब्रांचकडून सुरू आहे.  रणवीरच्या मॅनेजरला अमेरिकन मोबाइल नंबरवरून धमकीचा व्हॉइस नोट पाठवण्यात आला होता.

सांगायचं झालं तर, गेल्या काही महिन्यांपासून बॉलिवूड सेलिब्रिटींना येणाऱ्या धमक्यांचं प्रमाण वाढताना दिसत आहे. काही दिवसांपूर्वी ‘बिग बॉस 13’ फेम अभिनेत्री हिमांशी खुरानाला खंडणीची मागणी करत धमकी देण्यात आली. हिमांशीकडेही 10 कोटी रुपये खंडणीची मागणी करण्यात आली होती.

बॉलिवूडचा प्रसिद्ध आणि लोकप्रिय अभिनेता रोहित शेट्टी याच्या मुंबईतील जुहू येथील घरावर देखील गोळीबार करण्यात आला होता. रोहित याच्या घरावर करण्यात आलेल्या गोळीबाराची जबाबदारी देखील लॉरेन्स बिश्नोई गँगने स्वीकारली. त्यानंतर अभिनेता सलमान खान याची बहिण अर्पिता खान हिचा पती आयुष शर्मा याला देखील धमकी देण्यात आलेली. त्यानंतर आयुष आणि त्याच्या कुटुंबियांच्या सुरक्षेत देखील मोठी वाढ करण्यात आली.

अभिनेता सलमान खान याला देखील अनेकदा जीवे मारण्याच्या धमक्या देण्यात आल्या आहेत. एवढंच नाही तर, सलमान यांच्या मुंबईतील वांद्रे येथील घरावर देखील गोळीबार करण्यात आला. त्यानंतर सलमान खान याच्या सुरक्षेत देखील मोठी वाढ करण्यात आली.