धक्कादायक! सोशल मीडिया इन्फ्लुएन्सर निशा चौहानची पतीकडून निर्घृण हत्या; मुलावरही जीवघेणा हल्ला

मेरठ: मेरठच्या सरूरपूर भागात एक अत्यंत धक्कादायक घटना समोर आली आहे. सोशल मीडियावर आपल्या रील्समुळे प्रसिद्ध असलेल्या निशा चौहान (४५) यांची त्यांच्याच पतीने चाकूने वार करून निर्घृण हत्या केली आहे. या भयानक हल्ल्यात मध्यस्थी करण्याचा प्रयत्न करणारा त्यांचा मुलगाही गंभीर जखमी झाला आहे.

 

नेमकं काय घडलं? मिळालेल्या माहितीनुसार, निशा चौहान आणि त्यांचे पती प्रदीप यांच्यात हर्रा शहरातील जमिनीच्या एका भूखंडाच्या नोंदणीवरून वाद सुरू होता. गुरुवारपासून हा वाद विकोपाला गेला होता की, मालमत्ता कोणाच्या नावावर करावी, यावरून दोघांमध्ये जोरदार खडाजंगी झाली. शुक्रवारी सकाळी हा वाद पुन्हा उफाळून आला आणि प्रदीपने रागाच्या भरात धारदार चाकूने निशा यांच्यावर हल्ला केला.

मुलासमोरच आईची हत्या निशा या सोशल मीडियावर अत्यंत सक्रिय होत्या आणि इन्स्टाग्रामवर त्यांचे हजारो फॉलोअर्स होते. तसेच, त्या शहरात स्वतःचे ब्युटी पार्लरही चालवत होत्या. घटनेच्या वेळी निशा यांचा मुलगा घरीच होता. आईवर हल्ला होताना पाहून त्याने तिला वाचवण्याचा प्रयत्न केला, परंतु नराधम बापाने त्याच्यावरही वार केले. आई रक्ताच्या थारोळ्यात पडलेली पाहून मुलगा जोरात ओरडू लागला, ज्याचा आवाज ऐकून शेजारी मदतीसाठी धावून आले. मात्र, तोपर्यंत निशा यांचा मृत्यू झाला होता.

आरोपीची आत्महत्येचा प्रयत्न पत्नीची हत्या केल्यानंतर प्रदीपने स्वतःवरही चाकूने वार करून आत्महत्येचा प्रयत्न केला. शेजारी जेव्हा घटनास्थळी पोहोचले, तेव्हा प्रदीप रक्ताने माखलेल्या अवस्थेत बेशुद्ध पडला होता. पोलिसांनी तात्काळ घटनास्थळी धाव घेत जखमी प्रदीपला उपचारासाठी रुग्णालयात दाखल केले आहे.

पोलिस तपास सुरू सरधनाचे पोलीस अधीक्षक आशुतोष कुमार आणि स्टेशन हाऊस ऑफिसर गौरव सिंग यांनी घटनास्थळाची पाहणी केली असून फॉरेन्सिक टीमद्वारे पुरावे गोळा केले आहेत. परिसरातील सीसीटीव्ही फुटेजही ताब्यात घेण्यात आले आहेत. प्राथमिक तपासात मालमत्तेचा वाद हेच हत्येचे प्रमुख कारण असल्याचे समोर आले आहे. सध्या पोलीस अधिक कायदेशीर कारवाई करत आहेत.