नवी मुंबई: "मुलीवर जास्त प्रेम करतेस" म्हणून मुलाने जन्मदात्या आईची केली निर्घृण हत्या

नवी मुंबई: माझ्यापेक्षा मुलीवर जास्त प्रेम करते यावरून झालेल्या वादात संतप्त झालेल्या तरुणाने जन्मदात्या आईची हत्या केली. नवी मुंबईतील जुहूगावात ही संतापजनक घटना घडली. जमिनीवर डोकं आपटून आरोपीने आईची हत्या केली. या घटनेनंतर पोलिसांनी आरोपीला अटक केली. या घटनेमुळे परिसरात एकच खळबळ उडाली. सध्या पोलिस या प्रकरणाचा तपास करत आहेत.

 

मिळालेल्या माहितीनुसार, 'आई घरात मुलगा आणि सुनेकडे लक्ष देण्याऐवजी मुलीकडे जास्त लक्ष देत असल्याच्या रागातून मुलाने हे भयंकर कृत्य केले. रविवारी रात्रीच्या सुमारास आई आणि मुलामध्ये याच कारणावरून कडाक्याचे भांडण झाले. त्यानंतर रागाच्या भरात मुलाने आईला ढकलून दिलं नंतर जमिनीवर डोकं आपटून तिची हत्या केली. मंदा कदम असं हत्या झालेल्या महिलेचे नाव होते. या घटनेनंतर नवी मुंबई पोलिसांनी आरोपीविरोधात गुन्हा दाखल करत त्याला अटक केली. आरोपीला न्यायालयात हजर केले असता न्यायालयाने १३ ऑगस्टपर्यंत पोलिस कोठडी सुनावली.

धुळ्याच्या साक्री तालुक्यातील वाकी गावात पतीने आपल्या पत्नीची दगडाने ठेचून निघृण हत्या केल्याचा धक्कादायक प्रकार उघडकीस आला आहे. याप्रकरणी पिंपळनेर पोलिसांनी वेगाने तपास करत अवघ्या दोन तासांत संशयित आरोपीला अटक केली. या हत्येचे नेमके कारण काय याचा पोलिस तपास करत आहेत. चारित्र्याच्या संशयावरून आरोपीने पत्नीची हत्या केल्याचा संशय व्यक्त केला जात आहे.

वाकी गावच्या शिवारातील शेतात एका महिलेचा मृतदेह आढळून आला होता. पोलिसांनी तात्काळ घटनास्थळी धाव घेत तपासाला सुरुवात केली. हत्या झालेल्या महिलेचे नाव सुनंदा गोटू चौधरी (वय ४० वर्षे) असे होते. पिंपळनेर पोलिसांनी तपासाची चक्रे फिरवत अवघ्या दोन तासांत संशयित आरोपी पती गोटू गनसाराम चौधरी (वय ४६ वर्षे) याला अटक केली. चौकशीत त्याने बायकोच्या हत्येची कबुली दिली. याप्रकरणी पिंपळनेर पोलिस ठाण्यात हत्येचा गुन्हा दाखल करण्यात आला असून पोलिस पुढील तपास करत आहेत.

Disclaimer: या पोस्टमधील माहिती उपलब्ध वृत्तस्रोत व अधिकृत माहितीनुसार प्रकाशित करण्यात आली आहे. तपास किंवा अधिकृत प्रक्रियेनुसार तथ्यांमध्ये बदल होऊ शकतो.
या पोस्टचा उद्देश केवळ माहिती देणे असून अंतिम सत्यता संबंधित शासकीय यंत्रणा व न्यायालयीन प्रक्रियेवर अवलंबून आहे.