शिरूरमध्ये मध्यरात्री तुफान राडा! दोन गटांत दगडफेक आणि शिवीगाळ; ५० जणांवर गुन्हे दाखल

शिरूर (पुणे): शिरूर पोलिस स्टेशनच्या आवारातच मध्यरात्री दोन गटांमध्ये भीषण संघर्ष झाल्याची धक्कादायक घटना घडली आहे. आर्थिक वादातून सुरू झालेल्या या वादाचे रूपांतर दगडफेक आणि मारहाणीत झाले. जमाव आक्रमक झाल्याने पोलिसांनी लाठीमार करून परिस्थिती नियंत्रणात आणली. याप्रकरणी पोलिसांनी ५० जणांविरुद्ध गुन्हे दाखल केले आहेत.

नेमकी घटना काय?
मिळालेल्या माहितीनुसार, रविवारी (दि. ११) मध्यरात्री १२ च्या सुमारास हरीश राजपूत हा तरुण आर्थिक वादातून तक्रार देण्यासाठी शिरूर पोलिस स्टेशनला आला होता. त्याच वेळी दुसऱ्या गटातील राजू शेवाळे आणि त्यांचे समर्थकही तेथे पोहोचले. पोलिस तक्रार नोंदवून घेत असतानाच दोन्ही गटांमध्ये बाचाबाची सुरू झाली.

पोलिस स्टेशनमध्येच दगडफेक
वाद इतका विकोपाला गेला की, दोन्ही गटांतील तरुणांनी पोलिसांच्या समोरच एकमेकांवर दगडफेक सुरू केली. पोलिस कर्मचारी त्यांना शांत करण्याचा प्रयत्न करत होते, परंतु जमावाने कोणाचेही ऐकले नाही. अखेर पोलिस निरीक्षक संदेश केंजळे यांनी अतिरिक्त पोलिस बळाचा वापर करून लाठीमार केला आणि जमावाला पांगवले. या दगडफेकीत काही जण जखमी झाले असून त्यांना रुग्णालयात दाखल करण्यात आले आहे.

यांच्यावर झाले गुन्हे दाखल
पोलिस हवालदार सतीश मुंडे यांनी दिलेल्या फिर्यादीवरून पोलिसांनी ५० जणांवर गुन्हे दाखल केले आहेत. यामध्ये:

हरीश रवींद्र राजपूत, राजू शेवाळे, गणेश भोसले, विनोद जाधव, सलमान शेख, हाफिज शेख, कलिम सय्यद, कय्यूम सय्यद, तेजस जाधव, हबीब सय्यद, तरबेज बोरगे आणि इतर ४० अनोळखी व्यक्तींचा समावेश आहे.

पुढील तपास सुरू
या घटनेमुळे शिरूर शहरात खळबळ उडाली असून सार्वजनिक ठिकाणी शांततेचा भंग केल्याप्रकरणी कडक कारवाई करण्यात येत आहे. पोलिस उपनिरीक्षक शुभम चव्हाण या प्रकरणाचा पुढील तपास करत आहेत.