पुणे: १ हजार ३१७ बेवारस वाहनांचा जाहीर लिलाव; वाहतूक पोलिसांची मोठी कारवाई, वाहनमालकांना १५ दिवसांची मुदत

पुणे: शहरामध्ये रस्त्यांवर आणि विविध पोलीस ठाण्याच्या हद्दीत किंवा वाहतूक विभागाच्या कार्यालयाबाहेर वारंवार बेवारसपणे पडून राहिलेल्या वाहनांच्या समस्येवर पुणे शहर वाहतूक पोलिसांच्या वतीने एक महत्त्वपूर्ण व कडक पाऊल उचलण्यात आले आहे. पुणे शहरात विविध कारणांमुळे जप्त करण्यात आलेली आणि बेवारस म्हणून धूळ खात पडलेली तब्बल १ हजार ३१७ वाहने आता जाहीर लिलावाद्वारे (Public Auction) विल्हेवाट लावली जाणार आहेत. या संदर्भात पुणे शहर वाहतूक शाखेने अधिकृत प्रसिद्धी पत्रक जारी केले असून, या कारवाईमुळे शहरात बेवारस वाहनांमुळे होणारी विनाकारण जागा अडवणूक आणि पार्किंगच्या समस्या सुटण्यास मोठी मदत होणार आहे.

मिळालेल्या सविस्तर माहितीनुसार, पुणे शहर व उपनगरांच्या हद्दीमध्ये गेल्या काही काळापासून मोठ्या प्रमाणावर वाहने विविध दुर्घटना, गुन्हेगारी प्रकरणे, बेवारस स्थिती किंवा वाहतूक नियमांचे उल्लंघन यांसारख्या कारणांमुळे जप्त करण्यात आली होती. अनेक वाहनमालक आपली वाहने सोडवण्यासाठी पुढे आलेच नाहीत, ज्यामुळे पोलीस ठाण्यांच्या आवारात आणि राखीव जागांवर या बेवारस वाहनांचे ढीग साचले होते. यामुळे जागेचा अपव्यय होत असून परिसराचे सौंदर्यही बिघडत होते. यावर तोगाडा काढण्यासाठी वाहतूक विभागाने कायदेशीर प्रक्रिया पूर्ण करत या सर्व १ हजार ३१७ बेवारस वाहनांचा जाहीर लिलाव करण्याचा निर्णय घेतला आहे.

 

 

तथापि, या लिलावापूर्वी वाहनमालकांना एक अखेरची संधी देण्यात आली आहे. संबंधित वाहनावर किंवा या जप्त केलेल्या वाहनांपैकी कोणतीही गाडी आपली असल्याचे सिद्ध करण्यासाठी वाहनमालकांना मालकी हक्क दाखवावा लागणार आहे. प्रसिद्धी पत्रकाच्या दिनांकापासून पुढील १५ दिवसांच्या आत संबंधित वाहनमालकाने आवश्यक ती सर्व कायदेशीर कागदपत्रे, पासिंग, आरसी बुक (RC Book) आणि ओळखीचे पुरावे घेऊन संबंधित वाहतूक विभागाच्या पोलिस निरीक्षक किंवा सहायक पोलिस निरीक्षकांसमोर प्रत्यक्ष उपस्थित राहावे लागेल. आणि आपला अर्ज सादर करून कायदेशीर प्रक्रिया पूर्ण करावी लागेल.

जर ठरवून दिलेल्या १५ दिवसांच्या मुदतीत कोणीही मालक आपल्या वाहनावर हक्क सांगण्यासाठी पुढे आला नाही, किंवा वैध कागदपत्रे सादर केली नाहीत, तर ही सर्व वाहने नियमानुसार शासकीय लिलाव प्रक्रियेद्वारे विकली जातील, असा स्पष्ट इशारा वाहतूक विभागाने दिला आहे. पुणे शहरातील रस्ते मोकळे ठेवण्यासाठी आणि बेवारस वाहनांचा प्रश्न कायमचा मार्गी लावण्यासाठी पुणे पोलिसांची ही कारवाई अत्यंत महत्त्वाची मानली जात आहे. वाहनधारकांनी आणि नागरिकांनी यासंदर्भात लवकरात लवकर संपर्क साधावा, असे आवाहन प्रशासनाकडून करण्यात आले आहे.