Pune : पुण्यात थरारक गुन्हा: हत्या करण्याआधी बिअर पार्टी, पीडिताकडूनच खड्डा खोदून घेतला; ४ तास रंगलेला कट

Pune : पुण्यातील विश्रांतवाडी परिसरातून बेपत्ता झालेल्या 17 वर्षीय अमनसिंग गच्चड याच्या हत्येचा पोलिसांनी अखेर छडा लावला असून, या गुन्ह्यातील अमानुषता पाहून तपास यंत्रणाही चक्रावून गेल्या आहेत. केवळ जुन्या भांडणाचा वचपा काढण्यासाठी एका टोळीने अल्पवयीन मुलाला प्रेमाच्या जाळ्यात ओढलं आणि खेड शिवापूरच्या निर्जन डोंगरावर नेऊन त्याची अत्यंत क्रूरपणे हत्या केली.

अमनसिंग इन्स्टाग्रामवर सक्रिय...
तपासात समोर आलेल्या माहितीनुसार, मुख्य सूत्रधार प्रथमेश आढळ आणि मृत अमनसिंग यांच्यात सप्टेंबर 2025 मध्ये कडाक्याचं भांडण झालं होतं. या वादात प्रथमेश गंभीर जखमी झाला होता, ज्याचा राग त्याच्या मनात धुमसत होता. अमनसिंगचा ठावठिकाणा शोधण्यासाठी आरोपींनी सोशल मीडियाचा आधार घेतला. अमनसिंग इन्स्टाग्रामवर सक्रिय असल्याचं पाहून आरोपींनी एका तरुणीच्या मदतीने त्याला प्रेमाच्या जाळ्यात ओढलं. 29 डिसेंबर रोजी याच तरुणीने त्याला भेटायला बोलावलं आणि तो नकळत मृत्यूच्या सापळ्यात अडकला.

Pune : नॅशनल क्रश’ घेणार मुख्यमंत्री फडणवीसांची खास मुलाखत; अभिनेत्री गिरीजा ओक पहिल्यांदाच मुलाखतकाराच्या भूमिकेत

मारण्याआधी शेवटची इच्छा विचारली
खेड शिवापूर येथील वर्तुमुख मंदिराच्या डोंगराळ भागात आरोपींनी अमनसिंगला गाठलं. हत्येपूर्वीचा घटनाक्रम एखाद्या थरारपटापेक्षाही भयंकर होता. आरोपींनी अमनसिंगला ठार मारण्यापूर्वी त्याची शेवटची इच्छा विचारली. त्याने मागितलेली बिअर आणि सिगारेट त्याला देण्यात आली. इतकंच नाही तर क्रूरतेची सीमा ओलांडत आरोपींनी अमनसिंगला स्वतःचा खड्डा खोदायला लावला आणि त्याला जिवंत गाडण्याचा प्रयत्न केला. तो जिवंत राहू नये या भीतीने त्याला खड्ड्यातून बाहेर काढून सर्जिकल ब्लेडने वार केले. त्यानंतर कोयत्याने गळा चिरून आणि जड दगडाने डोके ठेचून त्याचा जीव घेतला. हा थरार तब्बल चार तास चालू राहिला.

कुजलेल्या अवस्थेतील मृतदेह
अमनसिंग घरी न परतल्याने त्याच्या आईने विश्रांतवाडी पोलीस ठाण्यात तक्रार दिली होती. गुन्हे शाखेने तांत्रिक तपास करत बेळगाव येथून प्रथमेश आढळ आणि नागेश धबाले या मुख्य आरोपींसह एका अल्पवयीन साथीदाराला बेड्या ठोकल्या. आरोपींनी दिलेल्या माहितीनुसार, 7 जानेवारी रोजी पोलिसांनी दुर्गम भागातून अमनसिंगचा कुजलेल्या अवस्थेतील मृतदेह बाहेर काढला. याप्रकरणी पोलिसांनी आतापर्यंत 5 जणांना ताब्यात घेतलं असून, एकूण 11 जणांवर गुन्हा दाखल करण्यात आला आहे. अटक केलेल्या आरोपींना न्यायालयाने 9 जानेवारीपर्यंत पोलीस कोठडी सुनावली आहे. वरिष्ठ पोलीस अधिकाऱ्यांच्या मार्गदर्शनाखाली या गुन्ह्याचा पुढील तपास सुरू असून, 'हनीट्रॅप'मध्ये सामील असलेल्या तरुणीचा शोध घेतला जात आहे.