Pune : पुण्यात धक्कादायक फसवणूक! “डिजिटल होम अरेस्ट”च्या नावाखाली १ कोटींचा घोटाळा, वृद्धाचा हृदयविकारानं मृत्यू

Pune : पुण्यातून एक धक्कादायक प्रकार समोर आला आहे. सायबर चोरट्यांनी “डिजिटल होम अरेस्ट”च्या नावाखाली एका ज्येष्ठ नागरिकाची तब्बल १ कोटी १९ लाख रुपयांची फसवणूक केली. या प्रकरणाचा मानसिक आणि आर्थिक धक्का बसल्यानं संबंधित वृद्ध व्यक्तीचा हृदयविकाराच्या झटक्यानं मृत्यू झाला.

या घटनेची तक्रार ८० वर्षीय महिलेने पुणे सायबर पोलीस ठाण्यात दिली आहे. त्या आपल्या पतींसह टिंगरे नगर परिसरात गेल्या २५ वर्षांपासून वास्तव्यास होत्या. त्यांच्या तीन मुली परदेशात असून, पती शासकीय सेवेतून निवृत्त झाले होते आणि पेन्शनवर उदरनिर्वाह करत होते.

Pune : पुण्यात धावत्या बसला आग! २० प्रवाशांचा थरारक बचाव , चालकाच्या तत्परतेमुळे टळला मोठा अनर्थ

घटनेचा तपशील असा की, ऑगस्ट महिन्यात सायबर चोरट्यांनी संबंधित वृद्ध व्यक्तीला फोन करून स्वतःला कुलाबा पोलीस ठाण्यातील अधिकारी म्हणून ओळख दिली. त्यांनी सांगितलं की, एका गुन्हेगारी प्रकरणात त्यांच्या नावाने बँक खाते वापरले गेले आहे, आणि त्या खात्यातून करोडो रुपयांचा व्यवहार झाल्याचं सांगून वृद्धाला घाबरवलं.

यानंतर, दुसऱ्या नंबरवरून एका व्यक्तीने स्वतःला सीबीआय अधिकारी म्हणून ओळख दिली आणि “मानवी तस्करी” प्रकरणात त्यांचं नाव असल्याचं सांगितलं. त्यांनी विचारलं — “तुम्हाला जेल अरेस्ट हवं का होम अरेस्ट?”
घाबरलेल्या वृद्धाने “होम अरेस्ट द्या” असं सांगताच, चोरट्यांनी व्हिडिओ कॉल करून त्यांच्या बँक खात्याची पडताळणी करण्याचा बहाणा केला. त्या प्रक्रियेतून १ कोटी १९ लाख रुपये ट्रान्सफर करण्यात आले.

या फसवणुकीनंतर वृद्धाने २२ सप्टेंबर रोजी सायबर पोलिसांकडे तक्रार दाखल केली आणि ऑनलाइन पोर्टलवरही अर्ज दिला. मात्र, अटकेच्या भीतीने ते मानसिकदृष्ट्या खचले होते. चोरट्यांनी धमकी दिली होती की, “तुम्ही कुणाला काही सांगितलं तर तुमच्या मुलींना त्रास होईल.”

या सततच्या मानसिक तणावामुळे वृद्ध व्यक्तीला हृदयविकाराचा झटका आला. त्यांना रुग्णालयात दाखल करण्यात आलं, परंतु आर्थिक नुकसान झाल्याने उपचारांचा खर्च उचलता न आल्याने अखेर त्यांचा मृत्यू झाला.

दरम्यान, तक्रार सप्टेंबरमध्ये दाखल झाल्यानेही पोलिसांनी तत्काळ कारवाई केली नाही, अशी माहिती समोर आली आहे. मात्र, वृद्धाच्या मृत्यूनंतर अखेर २५ ऑक्टोबर रोजी या प्रकरणी गुन्हा दाखल करण्यात आला आहे.

ही घटना पुन्हा एकदा दाखवते की, सायबर गुन्हेगारांचे डाव अधिक धोकादायक आणि भावनिकदृष्ट्या त्रासदायक होत आहेत.