रायगडमध्ये भीषण दुर्घटना! हायवा ट्रकमुळे पूल कोसळला; ४ ते ५ गावांचा संपर्क तुटला, ग्रामस्थ संतप्त

रायगड जिल्ह्यातील आमणोली गावाकडे जाणारा प्रवासी पूल कोसळल्याची धक्कादायक घटना समोर आली आहे. या दुर्घटनेमुळे परिसरात एकच खळबळ उडाली असून ४ ते ५ गावांचा संपर्क पूर्णपणे तुटला आहे. पुल कोसळल्याची माहिती मिळताच स्थानिक ग्रामस्थांनी घटनास्थळी मोठी गर्दी केली आणि प्रशासनाविरोधात संताप व्यक्त केला.

मिळालेल्या माहितीनुसार, खडी वाहतूक करणारा एक हायवा ट्रक पुलावरून जात असताना अचानक पूल कोसळला. ट्रकमध्ये क्षमतेपेक्षा जास्त माल भरल्यामुळे पुलावर अतिरिक्त भार आला आणि त्यामुळे ही दुर्घटना घडल्याचा प्राथमिक अंदाज व्यक्त केला जात आहे. पुलाचा काही भाग पूर्णपणे खचल्याने ट्रक अडकून पडला.

सुदैवाने या घटनेत कोणतीही जीवितहानी झाली नाही. मात्र, पूल कोसळल्यामुळे स्थानिक नागरिकांना मोठ्या अडचणींचा सामना करावा लागत आहे. विद्यार्थ्यांचे शिक्षण, रुग्णांची वाहतूक तसेच दैनंदिन व्यवहारांवर परिणाम झाला आहे. अनेक गावांचा संपर्क तुटल्याने ग्रामस्थांनी प्रशासनाच्या निष्काळजीपणावर प्रश्नचिन्ह उपस्थित केले आहे.

स्थानिकांनी सांगितले की, हा पूल आधीपासूनच धोकादायक अवस्थेत होता. याबाबत अनेक वेळा प्रशासनाकडे तक्रारी करूनही दुरुस्तीकडे दुर्लक्ष करण्यात आले. अखेर आज मोठी दुर्घटना घडल्याने ग्रामस्थांमध्ये संतापाची लाट उसळली आहे.

घटनेनंतर प्रशासन आणि संबंधित विभागाचे अधिकारी घटनास्थळी दाखल झाले असून परिस्थितीचा आढावा घेतला जात आहे. पर्यायी मार्ग उपलब्ध करून देण्याचे काम सुरू असल्याची माहिती प्रशासनाने दिली आहे.