छत्रपती संभाजीनगर: ७ वीतील मुलीची 'रॉब्लॉक्स' गेमवर मैत्री अन् स्नॅपचॅटवर ब्लॅकमेल करत मागितले न्यूड फोटो; मुकुंदवाडीत गुन्हा दाखल.

छत्रपती संभाजीनगर: शाळकरी मुलांना दिलेला स्मार्टफोन त्यांच्यासाठी आणि संपूर्ण कुटुंबासाठी कसा भयानक फास ठरू शकतो, याचा एक थरकाप उडवणारा प्रकार शहरात उघडकीस आला आहे. ऑनलाइन गेमिंग अॅपच्या मोहात पडलेल्या सातव्या वर्गातील मुलीस डिजिटल जाळ्यात ओढून, तिला ब्लॅकमेल करत तिचे आक्षेपार्ह फोटो घेऊन तिच्या कुटुंबाला ब्लॅकमेल केल्याचा गंभीर प्रकार घडला आहे. मुकुंदवाडी पोलिस ठाण्यात याप्रकरणी गुन्हा दाखल करण्यात आला असून सुशिक्षित कुटुंबातील मुलीसोबत घडलेल्या या प्रकारामुळे खळबळ उडाली आहे.

तक्रारीनुसार, मुलीने नोव्हेंबर २०२५ मध्ये मोबाइलवर 'रॉब्लॉक्स' हा ऑनलाइन गेम डाऊनलोड केला. गेम खेळण्यासाठी ऑनलाइन पार्टनर शोधताना तिची ओळख 'आर्यन अत्रे' नाव सांगणाऱ्या ऑनलाइन गेमिंग आयडीधारकाशी झाली. दोन दिवसांतच आरोपीने मुलीला स्नॅपचॅटवर दोन आयडी तयार करून देत पासवर्डही दिले. पुढे दोघांमध्ये चॅटिंग सुरू झाली. रॉब्लॉक्स, स्नॅपचॅटनंतर आरोपीने मुलीला व्हॉट्सअॅप सुरू करण्यास सांगितले. मुलीने नकार दिल्यावर आई-वडिलांच्या फोनमधून पैसे काढून घेण्याची धमकी दिली. घाबरलेल्या मुलीने व्हॉट्सअॅप सुरू केले. त्यावरून त्यांच्यात चॅटिंग सुरू झाली.

चॅटिंगवरून थेट न्यूड फोटोपर्यंत
मार्चमध्ये आरोपीने तिच्याकडे तिच्या न्यूड फोटोंची मागणी केली. मुलीने नकार दिल्यावर ब्लॅकमेल करणे सुरू केले. घाबरून मुलीने स्वतःचे आक्षेपार्ह फोटो काढून त्याला पाठवले. जुलै २०२६ मध्ये त्याने मुलीला इन्स्टाग्राम अॅप इन्स्टॉल करायला लावले. आयांश ठाकरे व मुझमिल खान नावाने वेगवेगळ्या आयडीवरून चॅटिंग सुरू झाली. ५ ऑगस्ट रोजी संशयिताने मुलीच्या आई, वडिलांना कॉल करून तुमची मुलगी माझ्या भावाशी 'चॅटिंग' करते, त्यामुळे माझा भाऊ आत्महत्या करत आहे, असा बनाव रचून पालकांना घाबरवले. कुटुंबाने ७ ऑगस्ट रोजी पोलिसांकडे धाव घेतली.

आंतरराष्ट्रीय स्तरावर वादग्रस्त ठरलेला 'रॉब्लॉक्स' गेम काय आहे?
- जगातील करोडो मुलांमध्ये लोकप्रिय ठरलेला 'रॉब्लॉक्स' गेम लहान मुलांच्या सुरक्षेच्या दृष्टीने अत्यंत धोकादायक मानला जात आहे. जिथे मुले स्वतःचे गेम तयार करू शकतात आणि जगभरातील अनोळखी लोकांशी चॅट करत खेळू शकतात.
- नामांकित आंतरराष्ट्रीय माध्यमे, वृत्तपत्रांनी रॉब्लॉक्सबाबत लहान मुलांचे होणारे लैंगिक शोषण, फसवणुकीबाबत धक्कादायक अहवाल प्रसिद्ध केले आहेत. कायदेतज्ज्ञांनी या गेमला बाल शोषकांसाठी 'डिजिटल हंटिंग ग्राउंड' (शिकारीचे ठिकाण) म्हटले आहे.

- गेममधील मोफत चॅट फीचरचा फायदा घेऊन सराईत गुन्हेगार लहान मुलांशी मैत्री करतात, त्यांना इन-गेम गिफ्ट्स किंवा पॉईंट्स देऊन जाळ्यात ओढतात आणि नंतर स्नॅपचॅट किंवा इन्स्टाग्रामवर नेऊन त्यांचे ब्लॅकमेलिंग करतात. अमेरिकेत सध्या या गेमिंग कंपनीविरोधात शेकडो पालकांनी न्यायालयात खटले दाखल केले आहेत.

ब्रिटनमध्ये तरुणाला शिक्षा
एप्रिल २०२६ मध्ये ब्रिटनमध्ये रोब्लॉक्सवर १४ वर्षांच्या मुलीशी ओळख झाल्यानंतर तिला ब्लॅकमेलिंग करणाऱ्या तरुणाला २८ महिन्यांच्या तुरुंगवासाची शिक्षा झाली. त्याने देखील लैंगिक स्वरूपाचे संभाषण, छायाचित्रांची देवाणघेवाण केल्याचे समोर आले.