झटक्यात झाली श्रीमंत… एलन मस्कपेक्षा 1 लाख पट जास्त संपत्ती, जागतिक अर्थव्यवस्थाही फिकी; कसं घडलं?

देणारा जेव्हा देतो, तेव्हा छप्पर फाडून देतो, अशी मराठीत म्हण आहे. पण एका महिलेच्या बाबतीत छप्पर फाडून मिळालं पण अटीवर मिळालं अशी गोष्ट घडली आहे. नॉटिंघममधील 29 वर्षीय सोफी डाऊनिंग हिच्या बाबतीत एक विलक्षण प्रसंग घडला आहे. ती अचानक जगातील सर्वात श्रीमंत महिला बनली आहे. ध्यानीमनीही नसताना ही गोष्ट घडल्याने ती भारावून गेली आहे. अगदी Elon Musk पेक्षाही लाखो पट अधिक संपत्तीची ती मालकीण झालीय! पण गंमत म्हणजे, ती ही संपत्ती फक्त दोन गोष्टींवरच खर्च करू शकते, ते म्हणजे कॉफी आणि क्रोइसाँट्स.

कशी वाढली संपत्ती?

ख्रिसमसच्या निमित्ताने सोफीला 200 Degrees Coffee या कॅफेकडून 10 पाउंड (सुमारे 1200 रुपये) किमतीचा व्हाउचर मिळाला होता. 12 फेब्रुवारी रोजी तिने तो व्हाउचर वापरला. मात्र बिलावर उरलेला बॅलन्स पाहून ती थक्क झाली. व्हाउचरमध्ये तब्बल 63 क्वाड्रिलियन पाउंड (63 आणि त्यानंतर 15 शून्ये) इतकी रक्कम शिल्लक असल्याचे दिसत होते. जगातील श्रीमंत व्यक्तींच्या श्रीमंतीकडे पाहता ही रक्कम Elon Musk यांच्या संपत्तीपेक्षा सुमारे एक लाख पट अधिक आहे. इतकेच नव्हे, तर हा आकडा जागतिक अर्थव्यवस्थेपेक्षा सुमारे 670 पट जास्त असल्याचे सांगितले जाते.

चूक कशी झाली?

सोफीच्या मते, कॅफेमध्ये व्हाउचरचा बारकोड स्कॅन करताना रक्कम व्यवस्थित नोंदवली गेली नसावी. त्यामुळे बारकोडमधील आकडेच शिल्लक रकमेप्रमाणे प्रणालीमध्ये दिसू लागले असावेत. तिने एका वृत्तसंथेशी बोलताना सांगितले की, ही रक्कम पाहून तिला आश्चर्य वाटले आणि थोडेसे हसूही आले. काउंटरवरील कर्मचाऱ्यालाही हा आकडा पाहून धक्का बसला, मात्र त्याने कोणतीही तक्रार केली नाही.

आता दुकानच खरेदी करू शकते

व्हाउचरमधील शिल्लक रक्कम इतकी प्रचंड आहे की, ती संपूर्ण दुकानातील सर्व सामान खरेदी करू शकते. तरीही सोफीने तसे न करण्याचा निर्णय घेतला आहे. तिच्या मते, तसे केल्यास अनावश्यक अडचणी निर्माण होऊ शकतात. सध्या मात्र ती या ‘अफाट संपत्ती’चा वापर फक्त कॉफी आणि क्रोइसाँट्स खरेदी करण्यापुरताच करत आहे.