सातारा: ८ वर्षांच्या बालिकेशी अश्लील चाळे; नातलग महिलेवर पोक्सो कायद्यांतर्गत गुन्हा

सातारा: शहरातून एक अत्यंत धक्कादायक घटना समोर आली आहे. ८ वर्षांच्या एका चिमुरडीवर नात्यातीलच ३५ वर्षीय महिलेने अश्लील चाळे केल्याची घटना घडली आहे. या प्रकरणी शाहूपुरी पोलीस ठाण्यात संबंधित महिलेवर 'पोक्सो' (POCSO) कायद्यान्वये गुन्हा दाखल करण्यात
आला असून, या घटनेने परिसरात एकच खळबळ उडाली आहे.

नेमकी घटना: पीडित मुलगी ही मूळची सोलापूर जिल्ह्यातील रहिवासी आहे. काही दिवसांपूर्वी ती साताऱ्यात आपल्या नातेवाईकांकडे आली होती. या काळात संबंधित महिला या मुलीला रोज आंघोळ घालत असे. आंघोळ घालण्याच्या बहाण्याने ही महिला मुलीसोबत अश्लील चाळे करत होती.
या प्रकारामुळे लहान मुलगी प्रचंड घाबरली होती. प्रकार उघड कसा झाला?साताऱ्याहून परतल्यानंतर पीडित मुलगी सोलापूरला आपल्या घरी गेली. तिथे गेल्यानंतर तिने या सर्व प्रकाराची माहिती आपल्या पालकांना दिली.

मुलीच्या तोंडून हा धक्कादायक प्रकार ऐकल्यानंतर कुटुंबीयांना मोठा धक्का बसला. त्यांनी तातडीने तक्रार नोंदवली. त्यानंतर संबंधित महिलेवर कायदेशीर कारवाई करण्यात आली आहे. या घटनेमुळे नात्यातील विश्वासाला तडा गेला असून नागरिकांमधून तीव्र संताप व्यक्त केला जात आहे.