चंद्रपूर: अंगणवाडीतील पोषण आहाराच्या तांदळात आढळले जिवंत किडे; प्रयोगशाळेकडून तांदूळ 'असुरक्षित' घोषित.

चंद्रपूर: अंगणवाड्यांमध्ये वितरित पोषण आहारातील तांदळाच्या नमुन्यात जिवंत किडे आढळल्याने नागपूर येथील प्रादेशिक सार्वजनिक आरोग्य प्रयोगशाळेने ते 'असुरक्षित अन्न' घोषित केले आहे. या घटनेने लहान बालकांच्या आणि गर्भवती महिलांच्या आरोग्याच्या सुरक्षिततेवर गंभीर प्रश्न निर्माण झाले आहेत.

महिला व बालविकास विभागाच्या नागपूर विभागीय उपआयुक्त कार्यालयाकडून संबंधित तपासणी अहवाल जिल्ह्यातील बालविकास प्रकल्प अधिकाऱ्यांकडे पाठविण्यात आले आहेत. गोंडपिपरी व पोंभूर्णा तालुक्यांतील अंगणवाडी प्रकल्पांशी संबंधित नमुने तपासणीसाठी पाठविण्यात आले होते. ६ महिने ते ६ वर्षे वयोगटातील लाभार्थ्यांना देण्यात येणाऱ्या गरम ताज्या आहारासाठी वापरल्या जाणाऱ्या धान्याची तपासणी करण्यात आली. पुढील कार्यवाहीसाठी तो संबंधित अधिकाऱ्यांकडे पाठविण्यात आल्याचे अहवालात नमूद आहे. यानंतरच्या दुसऱ्या तपासणी अहवालातही धक्कादायक चित्र समोर आले. गव्हामध्ये १.५३ टक्के बाह्य पदार्थ, वाटाण्यात ४.२८ टक्के रंग बदललेले दाणे तसेच ८.५३ टक्के इतर खाद्यधान्यांचे मिश्रण आढळले. निर्धारित मर्यादा अनुक्रमे एक टक्का, तीन टक्के आणि दोन टक्के आहे. या अहवालातील तांदळाच्या नमुन्यातही जिवंत किडे आढळले आणि तो नमुना पुन्हा एकदा 'असुरक्षित अन्न' म्हणून नोंदविण्यात आला आहे.

गहू, वाटाण्यातही निकषांचा भंग
एका अहवालात गव्हाच्या नमुन्यात १.६ टक्के बाह्य पदार्थ आढळले. अन्न सुरक्षा मानकानुसार त्याचे प्रमाण एक टक्क्यांपेक्षा अधिक नसावे.
वाटाण्याच्या नमुन्यात ४.३८ टक्के रंग बदललेले दाणे आढळले, तर निर्धारित मर्यादा तीन टक्के आहे. याच नमुन्यांमध्ये मूगडाळ, आयोडाइज्ड मीठ, साखर, मिरची पावडर आणि हळद या पदार्थांचे नमुने निर्धारित निकषांमध्ये असल्याचे अहवालात नमूद आहे.

लहान बालके व गरोदर मातांच्या आरोग्याशी खेळ : विजय वडेट्टीवार
अंगणवाडीतील बालकांच्या पोषणासाठी वितरित होणाऱ्या अन्नधान्याच्या नमुन्यांतच असे गंभीर दोष आढळल्याने संबंधित यंत्रणांच्या कार्यपद्धतीवर प्रश्न उपस्थित होत आहेत. हाच आहार गर्भवती महिलांनाही दिला जातो.
हा प्रकार राज्यभर झाल्याचे नाकारता येत नाही. हा लहान बालकांसह गरोदर मातांच्या आरोग्याशी खेळ आहे. निकृष्ट व असुरक्षित अन्नधान्याचा पुरवठा कुठून झाला, त्यासाठी जबाबदार कोण? संबंधितांवर गुन्हे दाखल करावे, अशी मागणी हा अहवाल दाखवत काँग्रेसचे विधिमंडळ नेते तथा आमदार विजय वडेट्टीवार यांनी पत्रकारांशी बोलताना केली.