मुंबई: मॉर्निंग वॉकला जाणे पडले महागात; मुंबईत पहाटे फिरायला गेलेल्या तरुणावर चाकूने वार करत पैसे लुटले!

मुंबई: भांडुपमधून एक अत्यंत खळबळजनक आणि सुरक्षेचा प्रश्न ऐरणीवर आणणारी घटना समोर आली आहे. नियमित आरोग्य राखण्यासाठी सकाळी मॉर्निंग वॉकसाठी गेलेल्या एका युवकावर अज्ञात गुंडाने अचानक प्राणघातक हल्ला केला. नशा करण्यासाठी पैशांची मागणी केली आणि पैसे देण्यास नकार दिल्याने तरुणावर चाकूने वार करत त्याच्याकडील रक्कम लुटून नेल्याची घटना घडली आहे. याप्रकरणी भांडुप पोलिसांनी संशयित आरोपीविरुद्ध गुन्हा नोंदवला असून कसून तपास सुरू आहे.

नेमकी घटना कशी घडली? पोलिसांनी दिलेल्या सविस्तर माहितीनुसार, तनूज सांगळे (वय ३०) असे जखमी झालेल्या तरुणाचे नाव आहे. तनूज सांगळे हे शुक्रवारी पहाटे ४:४५ वाजण्याच्या सुमारास आपले मित्र शैलेश गुप्ता आणि ऋषी गुप्ता यांच्यासोबत नेहमीप्रमाणे मॉर्निंग वॉकसाठी बाहेर पडले होते. पहाटे ५ वाजण्याच्या सुमारास ते भांडुपमधील सन्मान सिंह रोड, खिराडे कंपाउंड, गणेशनगर परिसरात आले असता, तिथे आधीपासूनच असलेल्या नितेश अनभुले या संशयिताने त्यांचा रस्ता अडवला.

रस्ता अडवून संशयिताने त्यांना विनाकारण शिवीगाळ करण्यास सुरुवात केली. नशा करण्यासाठी दोन हजार रुपयांची तातडीची मागणी त्याने तनूज सांगळे यांच्याकडे केली. एवढ्या सकाळी आपल्याकडे एवढे पैसे नाहीत, असे सांगत तनूज यांनी पैसे देण्यास स्पष्ट नकार दिला.

चाकूने वार आणि नागरिकांमध्ये भीती: पैसे देण्यास नकार दिल्याने संतापलेल्या नितेश अनभुले याने त्यांना अरेरावी करत जिवे मारण्याची धमकी दिली आणि अचानक स्वतःकडील धारदार चाकू बाहेर काढला. काही समजण्याच्या आतच त्याने तनूज सांगळे यांच्या उजव्या हातावर चाकूने वार करून त्यांना रक्तबंबाळ केले.

अचानक झालेल्या या हल्ल्यामुळे घाबरलेल्या तरुणाने आणि त्याच्या मित्रांनी जीवाच्या अकंताने मदतीसाठी आरडाओरडा केला. बुवाचा आवाज ऐकून त्यांचे मित्र तसेच परिसरातील इतर नागरिक तातडीने मदतीसाठी धावून आले. परंतु, आरोपी नितेश याने हातातला उघडा चाकू हवेत फिरवत जर कोणी मध्ये आले तर त्यालाही जीवे मारण्याची धमकी दिली, त्यामुळे सुरक्षेच्या कारणास्तव नागरिक जवळ येण्यास घाबरले. या गोंधळाचा फायदा घेत आरोपी तिथून पसार झाला.

या प्रकरणी जखमी तरुण तनूज सांगळे यांनी दिलेल्या फिर्यादीवरून भांडुप पोलीस ठाण्यात संशयित आरोपी नितेश अनभुले याच्याविरुद्ध कायदेशीर गुन्ह्याची नोंद करण्यात आली असून, पोलीस त्याचा कसून शोध घेत आहेत.