देशभरात ३० हजार कोटींचा महाघोटाळा! ड्रायव्हर-नोकराच्या नावे बनावट कंपन्या, देश हादरवणाऱ्या डिजिटल अरेस्ट रॅकेटचा पर्दाफाश; ED कडून मुंबईतून दोघांना अटक

मुंबई : देशभरात पसरलेल्या आणि सुरक्षा यंत्रणांची झोप उडवणाऱ्या एका अत्यंत मोठ्या सायबर फसवणुकीच्या व 'डिजिटल अरेस्ट' (Digital Arrest) रॅकेटचा सक्तवसुली संचालनालयाने (ED) पर्दाफाश केला आहे. तब्बल ३० हजार कोटी रुपयांच्या संशयास्पद आर्थिक उलाढालीशी संबंधित असलेल्या या मनी लाँडरिंग प्रकरणातून ईडीने मुंबईतून दोघा जणांना बेड्या ठोकल्या आहेत. या धक्कादायक कारवाईमुळे देशभरातील सायबर गुन्हेगारीच्या वर्तुळात मोठी खळबळ उडाली आहे.

मिळालेल्या सविस्तर माहितीनुसार, गोव्यातील एका महिलेची डिजिटल अरेस्टच्या माध्यमातून तब्बल २.६० कोटी रुपयांची फसवणूक झाल्याप्रकरणी हा तपास सुरू करण्यात आला होता. या प्रकरणात तपास करत असताना ईडीच्या हाती एका प्रचंड मोठ्या आंतरराज्यीय आणि देशव्यापी सायबर गुन्हेगारी नेटवर्कचा सुगावा लागला. या रॅकेटद्वारे देशभरात तब्बल ३० हजार कोटी रुपयांचे व्यवहार झाल्याचा संशय तपास यंत्रणेला आहे. या नेटवर्कविरुद्ध देशातील तब्बल २० राज्ये आणि केंद्रशासित प्रदेशांमध्ये सुमारे १५० ते १६० गुन्हे (FIRs) दाखल असून, ३०० हून अधिक पीडितांच्या तक्रारी यामध्ये नोंदवल्या गेल्या आहेत. या माध्यमातून एकूण ४,००० कोटी रुपयांची फसवणूक झाल्याचा प्राथमिक अंदाज आहे.

काय आहे ड्रायव्हर आणि नोकरांचा बनावट कंपन्यांचा खेळ? ईडीच्या तपासात या सायबर गुन्हेगारांची अत्यंत चलाख मोडसॉपरेंडी (Modus Operandi) समोर आली आहे. या टोळीने बनावट किंवा शेल कंपन्या (Shell Companies) तयार केल्या होत्या. धक्कादायक बाब म्हणजे, या कंपन्या कागदावर मोठ्या दाखवण्यात आल्या होत्या, परंतु प्रत्यक्षात या कंपन्यांचे संचालक म्हणून सामान्य ड्रायव्हर, वाहनचालक आणि साध्या नोकऱ्या करणारे कर्मचारी यांना पुढे केले गेले होते. हे सर्व लोक छोट्या खोल्यांमध्ये किंवा सिंगल-रूम आकलमेशनमध्ये राहणारे आहेत, ज्यांच्या नावाचा गैरवापर करून आर्थिक गैरव्यवहार चालवला जात होता.

पीडित लोकांकडून उकळलेली रक्कम बँक खात्यांमध्ये जमा केली जात असे, त्यानंतर ती तातडीने रोख स्वरूपात (Cash) काढून आरबीआय-परवानाधारक मनी चेंजरच्या माध्यमातून परदेशी चलनात रूपांतरित केली जात होती. ईडीने या प्रकरणी मुंबई आणि गोव्यात छापेमारी करत आतापर्यंत सुमारे ३.२5 कोटी रुपयांची रोकड जप्त केली आहे. या रॅकेटमधील फहीम मोईन हुसेन सैयद आणि नईम मुईन सैयद या दोघांना मुंबईतून अटक करण्यात आली असून, पुढील कसून चौकशी सुरू आहे.