पुण्यात जुन्या वादातून रक्ताचा सडा; कोथरुडमध्ये कोयत्याने वार, तर हडपसरमध्ये डोक्यात घातला सिमेंटचा गट्टू

पुणे | पुणे शहरात गुन्हेगारीच्या घटनांनी पुन्हा एकदा डोकं वर काढलं असून, जुन्या वादातून तरुणांवर जीवघेणे हल्ले होण्याचे दोन स्वतंत्र प्रकार उघडकीस आले आहेत. कोथरुडमध्ये एका तरुणावर कोयत्याने वार करण्यात आले, तर हडपसरमध्ये एका तरुणाच्या डोक्यात सिमेंटचा गट्टू घालून त्याला जीवे मारण्याचा प्रयत्न झाला. दोन्ही प्रकरणांत पोलिसांनी खुनाचा प्रयत्न केल्याचे गुन्हे दाखल केले आहेत.

प्रकरण १: कोथरुडमध्ये कोयता गँगची दहशत
कोथरुडमधील केळेवाडी परिसरात ३ मे रोजी रात्री ही घटना घडली. आदित्य ऊर्फ सनी राजू गाडे (वय २१) असे जखमी तरुणाचे नाव आहे. पोलिसांनी दिलेल्या माहितीनुसार, राहुलसिंग टाक याने गाडे यांच्या नात्यातील एका मुलीला पळवून नेले होते, त्यावरून त्यांच्यात पूर्ववैमनस्य होते. याच वादातून राहुलसिंग टाक, अनिलसिंग टाक, पिंटूसिंग दुधाणी आणि सुखासिंग दुधाणी यांनी आदित्यला रस्त्यात अडवून त्याच्यावर कोयत्याने सपासप वार केले. या हल्ल्यात आदित्य गंभीर जखमी झाला असून, त्याच्या पत्नीने गायत्री गाडे (वय १९) हिने कोथरुड पोलीस ठाण्यात फिर्याद दिली आहे. सहाय्यक पोलीस आयुक्त सुजाता तानवडे आणि वरिष्ठ पोलीस निरीक्षक संदीप देशमाने यांनी घटनास्थळी भेट दिली असून फरार आरोपींचा शोध सुरू आहे.

प्रकरण २: हडपसरमध्ये सिमेंटच्या गट्टूने हल्ला  दुसरी घटना हडपसरमधील काळेपडळ परिसरात घडली. येथे गणेश संजू बिरादार (वय २५, रा. सासाणेनगर) या तरुणावर जुन्या भांडणाचे निमित्त काढून हल्ला करण्यात आला. आरोपी दुर्वांग मानकर आणि साहिल शेलार यांनी गणेशला शिवीगाळ करत बेदम मारहाण केली आणि त्याच्या डोक्यात सिमेंटचा मोठा गट्टू घातला.

या हल्ल्यात गणेश गंभीर जखमी झाला असून त्याच्या पत्नीने अपेक्षा बिरादार हिने काळेपडळ पोलीस ठाण्यात तक्रार दिली आहे. तीन महिन्यांपूर्वी झालेल्या भांडणाचा राग मनात धरून हा हल्ला केल्याचे प्राथमिक तपासात समोर आले आहे.