२८ लाखांचे लाच प्रकरण: सहायक पोलीस निरीक्षक वैशाली तोटेवार अखेर निलंबित; पोलीस आयुक्तांचे मोठे पाऊल

पुणे | पुणे पोलिसांच्या आर्थिक गुन्हे शाखेत (EOW) कार्यरत असताना २८ लाख रुपयांची लाच घेतल्याच्या आरोपावरून सहायक पोलीस निरीक्षक (API) वैशाली तोटेवार यांच्यावर निलंबनाची कुऱ्हाड कोसळली आहे. पोलीस आयुक्त अमितेश कुमार यांनी यासंदर्भात आदेश जारी केले असून, या कारवाईमुळे पोलीस दलात मोठी खळबळ माजली आहे.

बदली झाली, पण कारवाई सुटली नाही
विशेष म्हणजे, तोटेवार यांची नुकतीच पदोन्नतीने मुंबई लोहमार्ग पोलीस दलात 'पोलीस निरीक्षक' म्हणून बदली झाली होती. बदली झाल्यानंतर त्यांना पुणे पोलिसांच्या आर्थिक गुन्हे शाखेतून कार्यमुक्तही (Relieve) करण्यात आले होते. मात्र, लाच प्रकरणाचे गांभीर्य लक्षात घेता, पोलीस उपायुक्त विवेक मासाळ यांनी दिलेल्या माहितीनुसार, त्यांचा कार्यमुक्तीचा आदेश रद्द करण्यात आला असून त्यांना सहायक पोलीस निरीक्षक पदावरून निलंबित करण्यात आले आहे.

नेमके प्रकरण काय?
आर्थिक गुन्हे शाखेत कार्यरत असताना तोटेवार यांच्याकडे जमिनीच्या एका प्रकरणातील तक्रार अर्जाच्या चौकशीची जबाबदारी होती. या चौकशीत मदत करण्यासाठी त्यांनी तक्रारदाराकडे तब्बल ३० लाख रुपयांच्या लाचेची मागणी केली होती. त्यापैकी २ लाख रुपये तक्रारदाराने सुरुवातीलाच दिले होते. उर्वरित २८ लाख रुपये स्वीकारण्यासाठी तोटेवार यांनी शनिवारी (२ मे) बंडगार्डन रस्त्यावरील एका पंचतारांकित हॉटेलजवळ तक्रारदाराला बोलावले होते.

एसीबीचा सापळा आणि अटक
लाचलुचपत प्रतिबंधक विभागाने (ACB) या ठिकाणी सापळा रचला होता. तोटेवार यांनी ही रक्कम स्वतः न स्वीकारता त्यांचे ओळखीचे संभाजी शिवाजी चव्हाण (वय ४७, रा. सदाशिव पेठ) याला पाठवले होते. २८ लाखांची लाच स्वीकारताना एसीबीने चव्हाणला रंगेहाथ पकडले. चौकशीत तोटेवार यांनीच चव्हाणला पाठवल्याचे स्पष्ट झाल्यानंतर दोघांनाही अटक करण्यात आली. न्यायालयाने त्यांना ६ मे पर्यंत पोलीस कोठडी सुनावली आहे.