मार्केट यार्डातील पेट्रोल पंपावर 'सायबर' डल्ला; ५० रुपयांच्या कमिशनसाठी व्यवस्थापकाकडून बँक खातेच स्वाधीन

पुणे | पुणे कृषी उत्पन्न बाजार समितीच्या पेट्रोल पंपावर सायबर चोरट्यांच्या मदतीने बेकायदेशीर आर्थिक व्यवहार झाल्याचा धक्कादायक प्रकार उघडकीस आला आहे. केवळ ५० रुपयांच्या क्षुल्लक कमिशनच्या मोहापोटी पंपाचे बँक खाते सायबर गुन्हेगारांच्या हवाली केल्याप्रकरणी मार्केट यार्ड पोलिसांनी व्यवस्थापकासह तिघांविरुद्ध गुन्हा दाखल केला आहे.

काय आहे नेमके प्रकरण?
पोलिसांनी दिलेल्या माहितीनुसार, हा सर्व गैरप्रकार १६ मार्च ते २ मे या कालावधीत घडला. पंपाचा व्यवस्थापक सुनील सुंदरराव मोरे (३१, रा. लोणी काळभोर) याने आरोपी करण चौधरी (रा. राजस्थान) याच्या सांगण्यावरून पेट्रोल पंपाचा अधिकृत 'स्कॅनर' त्याला पाठवला होता. या स्कॅनरचा वापर करून सायबर चोरटे फसवणुकीचे पैसे थेट पंपाच्या बँक खात्यावर वळवत असत. त्यानंतर मोहन भरत सोनार (रा. गुलटेकडी) हा पंपावर येऊन पैसे जमा झाले आहेत का, याची खातरजमा करायचा.

कमिशनचे गणित आणि फसवणूक
या व्यवहारांमध्ये दर १० हजार रुपयांमागे २०० रुपये कमिशन ठरले होते. त्यापैकी ५० रुपये व्यवस्थापक मोरे स्वतःकडे ठेवत असे, तर उर्वरित १५० रुपये इतर कामगारांमध्ये वाटले जात होते. मोरे आपल्या मोबाईलवरील 'मोबिक्विक' ॲपद्वारे खात्यात जमा झालेल्या रक्कमेची तपासणी करायचा आणि त्यानंतर खात्यात जमा झालेली रक्कम रोख स्वरूपात सोनारला दिली जात असे.

७ लाखांहून अधिक रकमेचे व्यवहार
तक्रारीनुसार, सायबर फसवणुकीतील तब्बल ७ लाख १९ हजार १३ रुपये या बँक खात्यात स्वीकारले गेले आहेत. एका ४३ वर्षीय व्यक्तीने या संदर्भात मार्केट यार्ड पोलीस ठाण्यात तक्रार दिली होती. त्यावरून पोलिसांनी सुनील मोरे, मोहन सोनार आणि करण चौधरी यांच्यावर गुन्हा नोंदवला आहे. सायबर गुन्हेगारीचे हे नवे स्वरूप पाहून पोलीस प्रशासनही चक्रावून गेले असून, या प्रकरणाचा अधिक तपास सुरू आहे.