बीडमध्ये इंधन टंचाईचा भडका; सलग सुट्ट्यांमुळे वितरणाचे गणित कोलमडले, जिल्हाधिकाऱ्यांना साकडे

बीड | प्रतिनिधी
१ मे रोजीची महाराष्ट्र दिनाची सुट्टी आणि त्यानंतर आलेल्या रविवारमुळे बीड जिल्ह्यात इंधन टंचाईचे संकट गडद झाले आहे. शहरात सलग तिसऱ्या दिवशी पेट्रोल आणि डिझेलचा तुटवडा कायम असून, ज्या पंपांवर साठा उपलब्ध आहे, तिथे वाहनांच्या लांबच लांब रांगा पाहायला मिळत आहेत. टँकर येताच काही तासांतच साठा संपत असल्याने सर्वसामान्यांची मोठी ओढाताण होत आहे.

साठेबाजीमुळे टंचाईची तीव्रता वाढली
जिल्ह्यात शनिवारी रात्री ७५ टँकर उपलब्ध झाले होते, मात्र नागरिकांनी भीतीपोटी मोठ्या प्रमाणात साठा केल्याने रविवारी सकाळीच पंप कोरडे झाले. प्रत्यक्षात इंधनाचा तुटवडा १० ते २० टक्के असताना, साठेबाजीमुळे तो अधिक तीव्र भासत आहे. विशेषतः शेतकरी भविष्यातील गरजेपोटी जास्तीचे डिझेल कॅनमध्ये भरून ठेवत आहेत, ज्यामुळे साठा लवकर संपत आहे. कॅनमध्ये इंधन देण्यास नकार दिल्यास कर्मचारी आणि ग्राहकांमध्ये वादाचे प्रसंग घडत आहेत.

ट्रान्सपोर्ट असोसिएशनचा जिल्हाधिकाऱ्यांवर मोर्चा
या सततच्या इंधन टंचाईच्या निषेधार्थ 'विश्वगती मोटार चालक ट्रान्सपोर्ट असोसिएशन'च्या वतीने सोमवारी जिल्हाधिकारी विवेक जॉन्सन यांना निवेदन देण्यात आले. इंधन टंचाईमुळे ट्रान्सपोर्ट व्यावसायिक आणि वाहनधारकांचे मोठे आर्थिक नुकसान होत असून, यावर त्वरित तोडगा काढण्याची मागणी यावेळी करण्यात आली.

प्रशासनाकडून उपाययोजनांची अपेक्षा
सलग सुट्ट्यांमुळे वितरणाचे संतुलन बिघडते, त्यामुळे महिन्यातील प्रत्येक दिवशी डेपो सुरू ठेवणे आवश्यक असल्याची मागणी होत आहे. तसेच, कोणत्या पंपावर इंधन उपलब्ध आहे याची माहिती आदल्या दिवशी वर्तमानपत्र किंवा सोशल मीडियाद्वारे प्रसिद्ध करावी, जेणेकरून नागरिकांची भटकंती थांबेल आणि पंपांवरील गर्दी नियंत्रित होईल. सध्या सोमवारी रात्री उशिरापर्यंत ३८ टँकर उपलब्ध होणार असल्याचे प्रशासनाकडून सांगण्यात आले आहे.