Nagpur : किरकोळ वादाचा भीषण शेवट; दारूच्या नशेत शेजाऱ्याचा महिलेसह लेकीवर हल्ला, माय-लेकीची निर्घृण हत्या

Nagpur : नागपूर जिल्ह्यातील उमरेड शहरात काल शनिवारी दुपारी घडलेल्या दुहेरी हत्याकांडाने संपूर्ण परिसर हादरून गेला आहे. गांगापूर कालवा परिसरातील झोपडपट्टीत दारूच्या नशेत असलेल्या शेजाऱ्याने किरकोळ वादातून माय-लेकींच्या डोक्यावर लाकडी दांड्याने जोरदार वार करून निर्घृण हत्या केल्याची धक्कादायक घटना घडली. या घटनेत पार्वता शंकर फुकट (वय 65) आणि त्यांची मुलगी संगीता वसंता रिठे (वय 40), दोघीही रा. गांगापूर, उमरेड यांचा घटनास्थळीच मृत्यू झाला. या प्रकरणातील आरोपी नितेश किसन ठाकरे (वय 31), रा. गांगापूर झोपडपट्टी, उमरेड याला पोलिसांनी तात्काळ अटक केली आहे.

मिळालेल्या माहितीनुसार, आरोपी आणि मृतक माय-लेकी शेजारी राहत होते. आरोपी नितेशला दारूचे व्यसन असून तो नशेत वारंवार शेजाऱ्यांशी वाद घालत असल्याची माहिती आहे. यापूर्वीही आरोपी आणि मृतकांमध्ये अनेकदा वाद झाले होते. काल शनिवारी दुपारी सुमारे 12.30 वाजताच्या सुमारास गांगापूर झोपडपट्टीतील मृतकांच्या राहत्या घरासमोर आरोपी नितेश आणि पार्वता फुकट यांच्यात किरकोळ कारणावरून वाद झाला. हा वाद पाहता पाहता विकोपाला गेला. वादाच्या भरात दारूच्या नशेत असलेल्या नितेशने जवळच असलेला लाकडी दांडा उचलला आणि पार्वता फुकट यांच्या डोक्यावर जोरदार वार केला. यात आईचा आवाज ऐकताच आईला वाचवण्यासाठी मुलगी संगीता रिठे तीला वाचवण्यासाठी मध्ये पडली असता आरोपीने तिच्याही डोक्यावर वार केले. या हल्ल्यात दोघीही रक्ताच्या थारोळ्यात खाली पडल्या आणि घटनास्थळीच त्यांचा मृत्यू झाला.

Pune : बंडू आंदेकरला मोठा धक्का; माजात गेलेला आता अडचणीत, निवडणूक लढवण्यावर प्रश्नचिन्ह?

घटनेची माहिती मिळताच उमरेड पोलीस ठाण्याचे पोलीस निरीक्षक धनाजी जळक यांच्यासह पोलीस पथकाने तात्काळ घटनास्थळी धाव घेतली. परिसरात तणावाचे वातावरण निर्माण झाले होते. पोलिसांनी मृतदेह ताब्यात घेऊन शवविच्छेदनासाठी पाठवले. याप्रकरणी फिर्यादी सौ. स्मिता पंकज जुमडे (वय 36) यांच्या तक्रारीवरून भारतीय न्याय संहितेच्या कलम 103 (1) अन्वये गुन्हा नोंदवण्यात आला आहे.

आरोपी नितेश ठाकरे याला ताब्यात घेऊन अटक करण्यात आली असून पुढील तपास पोलीस निरीक्षक धनाजी जळक यांच्या मार्गदर्शनाखाली उमरेड पोलीस करीत आहेत. भरदिवसा घडलेल्या या दुहेरी हत्याकांडामुळे उमरेड शहरासह संपूर्ण नागपूर जिल्ह्यात खळबळ उडाली असून, नागरिकांमध्ये भीतीचे वातावरण पसरले आहे.