Pune : बंडू आंदेकरला मोठा धक्का; माजात गेलेला आता अडचणीत, निवडणूक लढवण्यावर प्रश्नचिन्ह?

Pune : पुण्यातील गुन्हेगारी विश्वातील चर्चित नाव असलेल्या आंदेकर टोळीचा प्रमुख सूर्यकांत उर्फ बंडू आंदेकर याने शनिवारी पोलीस सुरक्षेत महापालिका निवडणुकीसाठी आपला उमेदवारी अर्ज भरण्यासाठी भवानी पेठ क्षेत्रीय कार्यालय गाठले. आयुष कोमकर हत्या प्रकरणात सध्या कारागृहात असलेल्या आंदेकरला विशेष न्यायालयाने अटी-शर्तींसह निवडणूक लढवण्यास परवानगी दिली आहे. या आदेशाचा आधार घेत आंदेकर आपल्या कुटुंबातील इतर सदस्यांसह अर्ज दाखल करण्यासाठी आला खरा, परंतु तांत्रिक त्रुटींमुळे त्याचा अर्ज शनिवारी स्वीकारला गेला नाही. हातात बेड्या आणि गळ्यात दोरखंड असलेल्या स्थितीत आंदेकरने ज्या प्रकारे घोषणाबाजी करत कार्यालयात प्रवेश केला, त्याने उपस्थित अधिकारी आणि नागरिकांचे लक्ष वेधून घेतले होते.

वास्तविक, न्यायालयाने आंदेकर कुटुंबाला अर्ज भरण्याची मुभा देताना स्पष्ट बजावले होते की, या प्रक्रियेदरम्यान कोणतीही मिरवणूक काढता येणार नाही किंवा प्रक्षोभक भाषणे व घोषणाबाजी करता येणार नाही. मात्र, या नियमांना हरताळ फासत बंडू आंदेकरने कार्यालयात शिरतानाच जोरदार घोषणाबाजी सुरू केली. "मला लोकशाहीत कसं आणलंय ते बघा", "मी उमेदवार आहे, दरोडेखोर नाही" आणि "आंदेकरांना मत म्हणजे विकासाला मत" अशा घोषणा त्याने मोठ्या आवाजात दिल्या. इतकेच नाही तर "नेकी का काम, आंदेकर का नाम" म्हणत त्याने स्वतःची पाठराखण करण्याचा प्रयत्न केला. यावेळी त्याच्यासोबत लक्ष्मी उदयकांत आंदेकर आणि सोनाली वनराज आंदेकर हेदेखील पोलीस बंदोबस्तात उपस्थित होते.

Pune : अजित पवारांच्या शिलेदाराचा भाजपवर थेट आरोप; ईव्हीएम मशीनवरून खळबळ, राजकीय वातावरण तापलं

या सर्व राड्यानंतर जेव्हा अर्ज सादर करण्याची वेळ आली, तेव्हा निवडणूक प्रशासनाच्या तपासणीत आंदेकरचा अर्ज अपूर्ण असल्याचे समोर आले. अर्जातील अनेक रकाने रिकामे असल्याने निवडणूक निर्णय अधिकारी कल्याण पांढरे यांनी हा अर्ज फेटाळला नाही, मात्र तो पूर्ण भरून आणण्यास सांगितले. अर्ज भरण्यासाठी अद्याप तीन दिवसांचा अवधी शिल्लक असल्याने, आता बंडू आंदेकर आणि त्याचे कुटुंबीय सोमवारी पुन्हा एकदा पूर्ण तयारीने भवानी पेठ क्षेत्रीय कार्यालयात येणार असल्याची माहिती समोर आली आहे. गुन्हेगारी पार्श्वभूमी असलेल्या उमेदवाराने पोलीस कोठडीतून दिलेली ही 'आक्रमक' एन्ट्री सध्या पुण्याच्या राजकीय वर्तुळात चांगलीच चर्चेत आली असून, प्रशासकीय नियमांच्या उल्लंघनाबाबत आता काय कारवाई होणार, याकडे सर्वांचे लक्ष लागले आहे.