तमिळनाडू: लज्जास्पद! डेटवर गेलेल्या विवाहित महिला पोलीस कॉन्स्टेबलवर तिघांचा सामूहिक बलात्कार; आरोपींना बेड्या.

तमिळनाडू: शिवगंगा जिल्ह्यातून एक अतिशय धक्कादायक आणि संतापजनक घटना समोर आली आहे. कायद्याचे रक्षण करणारी खाकी वर्दीही सुरक्षित नसल्याचे या घटनेने पुन्हा एकदा सिद्ध केले आहे. ३० वर्षीय विवाहित महिला पोलीस कॉन्स्टेबलसोबत सामूहिक बलात्काराची ही घटना घडली आहे.

नेमकी घटना काय?
शुक्रवारी रात्री ड्युटी संपल्यानंतर ही महिला पोलीस कॉन्स्टेबल तिचा मित्र डी. रॉबिन (वय २८, रा. तिरुपुवनम) याच्यासोबत जेवणासाठी (डिनर) बाहेर गेली होती. जेवण झाल्यानंतर दोघेही एका निर्जनस्थळी गेले. तिथे त्यांच्यात शारीरिक संबंध आले, मात्र त्यानंतर रॉबिनने त्या महिलेचा एक्स-बॉयफ्रेंड पी. महाराजा (वय २५, रा. सिथलांगुडी) याला फोन करून तिथे बोलावून घेतले.

महाराजा तिथे आपल्या मित्राला, हरी राजन याला सोबत घेऊन आला. तिथे आल्यावर महाराजाने पीडितेकडे शरीरसंबंधांची मागणी केली, ज्याला तिने कडाडून विरोध केला. मात्र, नराधम महाराजाने आणि त्यानंतर हरी राजनने पीडित महिला पोलिसावर बळजबरीने बलात्कार केला.

 

पीडितेची सुटका कशी झाली?
हे तिघे जण पुन्हा अत्याचार करण्याचा प्रयत्न करत असताना, पीडितेने प्रसंगावधान राखून तिथून पळ काढला. ती धावत जाऊन एका जवळच्या फार्म हाऊसवर पोहोचली. तिथे तिने एका व्यक्तीला घडलेला सर्व प्रकार सांगितला. त्या व्यक्तीने तत्काळ पोलिसांना माहिती दिली. पोलिसांनी तातडीने घटनास्थळ गाठून पीडितेची सुटका केली.

आरोपींना अटक:
या घटनेनंतर पोलिसांनी गुन्हा दाखल करून अवघ्या २४ तासांच्या आत मुख्य सूत्रधार डी. रॉबिन, पी. महाराजा आणि हरी राजन या तिन्ही नराधमांना अटक केली आहे. सध्या सर्व आरोपींना तुरुंगात पाठवण्यात आले असून पुढील तपास सुरू आहे.